Ilang sugatan sa procession ng Nazareno
MANILA, Philippines – Sugatan ang isang lalaki na kinuyog habang may ilan din ang nasugatan nang mahulog sa gutter ng karo dahil sa pagtutulakan at siksikan sa idinaos na Thanksgiving Procession ng Poong Nazareno, ng Minor Basilica Church sa Quiapo, Maynila, kahapon ng madaling araw.
Nabatid na nagsimula ang prusisyon bandang alas-2:22 ng madaling araw mula sa simbahan na dinaluhan ng may 5,000 deboto.
Nang pagsapit sa Claro M. Recto Avenue ay nahulog sa gutter ang isang gulong nito na nagresulta rin sa pagkakasugat at pagkakaipit ng ilang deboto.
May mga nahilo, nasaktan at nasugatan din naman dahil sa pagtutulakan at pagsisiksikan ng mga deboto na nais makalapit at makahipo sa imahe ng Nazareno na nagreresulta upang bumagal ang usad nito.
Nabugbog naman ng mga Hijos De Nazareno at iba pang deboto ang biktimang si Jonathan Macaraig nang mapagbintangan umanong siya ang dahilan o pasimuno ng pagtutulakan.
Dismayado naman si Macaraig sa nangyari dahil normal namang nagkakagitgitan ang mga deboto kapag prusisyon.
Nagpatulong si Macaraig at ang iba pa niyang kasamahan sa mga nakabantay na pulis para arestuhin ang mga debotong nanakit sa kanya.
- Latest