Preso sa MCJ kinuryente ang sarili, patay
MANILA, Philippines – Isang 38-anyos na preso ang natagpuang patay at sinasabing sinadyang magpakuryente sa live wire sa loob ng kubol sa Manila City Jail (MCJ) sa Sta. Cruz, Maynila, kamakalawa ng gabi.
Patuloy pang iniimbestigahan ni SPO2 Jonathan Bautista ng Manila Police District-Homicide Section ang insidente umano ng pagpapakamatay ng presong kinilalang si Gregorio Trinidad, nahaharap sa kasong possession of illegal drugs.
Sa inisyal na ulat mula kay Jail Officer 3 Jose Rodzon, dakong alas-10:00 ng gabi nang madiskubre ng isang Sonny Tazarte, hepe ng Culturero o taga head count ng Selda 1, na kulang ng isa ang inmates kaya hinanap ito kung saan nadiskubre na walang malay at nakaupo sa loob ng kubol habang ang dalawang paa ay nakakapit sa live wire.
Nabatid din sa ulat ni Rodzon, na ilang inmates umano ang nakapansin sa madalas na pagsasalitang mag-isa ng biktima at nabuburyong umano ito sa loob ng piitan.
Gayunman, patuloy pa rin ang isinasagawang imbestigasyon sa insi-dente upang matukoy kung nagkaroon ng foul play sa insidente.
- Latest
