Rumesbak para sa kaibigan, tinarakan

MANILA, Philippines - Patay ang isang 17-anyos na binatilyo nang saksakin ng isang lalaki na nag-trip umanong  manaksak sa kanyang kaibigan sa Binondo, Maynila, kamakalawa ng umaga.

Hindi na umabot ng buhay sa Metropolitan Medical Center  ang biktimang si Ian Villanueva, estudyante, ng Alvarado St., Binondo dahil sa tinamong saksak.

Naaresto naman ang suspect na nakilalang si Elmer Dangkalan, 21, ng nabanggit ding lugar.        

Ayon sa imbestigasyon ni PO3 Rodelio Lingcong ng MPD-Homicide, dakong alas-7:00 ng umaga nang maganap ang insidente sa panulukan ng C.M. Recto  at  Alvarado St., Binondo.

Bago ang insidente, nag-iinuman umano ang biktima kasama ang ilang kaibigan, nakilala sa pangalang  sina Joseph, Eurazo, at si Adonis. Ilang saglit pa ay tumayo si Adonis para umihi nang habang naghahanap ito ng lugar na maaaring maihian ay biglang lumapit ang suspect na may dalang patalim  at bigla itong inundayan ng saksak pero nakailag.               

Nakita naman ng mga kainuman ang ginawa kay Adonis  na kinabibilangan ng biktima kaya hinabol nila ito hanggang sa makorner nila sa isang compound.

Dahil sa wala nang matatakbuhan ay nanghalihaw na lamang ng saksak ang suspect sa mga humahabol at ang biktima ang siyang napuruhang tamaan sa dibdib.

Nasakote naman nang nagrespondeng pulisya ang suspect  at kasalukuyang pinipigil sa himpilan ng pulisya para sa pagsasampa ng kaso.