Presyo ng LPG,bumaba ng P11 kada tangke
MANILA, Philippines - Bagama’t patuloy na tumataas ang presyo ng oil products, nag-rollback naman sa presyo ng LPG ng may P11 kada tangke simula kahapon.
Ang P1 kada kilo o P11 kada tangke ng LPG na bawas sa presyo ay pabuwena-manong handog ngayong linggong ito ng Regasco, isang independent refiller ng LPG.
Ayon kay LPGMA partylist representative Arnel Ty, dapat ay sa susunod na buwan pa ipatutupad ang rollback pero nagdesisyon ang Regasco company na simulan ito ngayong linggo. Aniya, may kasunod pa itong rollback sa susunod na linggo at sa susunod na buwan ay malaking rollback pa ang kanilang ipatutupad.
Mula sa $1,350 kada metriko tonelada ng LPG ay bumagsak sa $1,220 ang contract price nito bunga ng pagbaba ng demand nito sa malalaking bansa dahil tapos na ang winter season at patuloy anyang bababa ang presyo ng LPG hanggang sa buwan ng Agosto o baka umabot pa hanggang Setyembre.
- Latest
- Trending