Rumesbak sa kaaway, estudyante patay

MANILA, Philippines – Hindi inaasahan ng isang 16-anyos na lalaki na magiging dahilan ng kanyang kamatayan ang kanyang pagresbak sa kalabang  grupo sa Tondo­, Maynila kahapon ng umaga­.

Dead-on-arrival sa Mary Johnston Hospital ang bik­timang si Nicole Kith Franco­, 4th year high school at residente  ng no.611 Pacheco St.,Tondo, dahil sa tama ng saksak sa likod.

Tinutugis naman ang  lima hanggang walong suspect na pawang kabataan, na tumakas matapos ma­kitang bumulagta ang biktima.

Sa ulat ni SPO2 Edmundo Cabal ng Manila Police District-Homicide Section, dakong alas-5 ng umaga nang maganap ang insidente sa harap ng isang bahay sa #615 Amarlanhagui St., ng nasabing lugar.

Nabatid na nagsimbang-gabi ang biktima at kaibigang si Mark Hunter dela Cruz, nang may makasalubong  na mga kabarkada at isa dito ang isang alyas “Rea” na nagbalitang dumaan ang kalabang grupo, na nanuntok kay dela Cruz noong Disyembre 16.

Sinugod ng grupo ng biktima ang grupo ng suspect  pero dahil  dehado, nagkani-kanyang takbo na lamang sila at si Franco ay napunta sa Alarmanhagui st. kung saan siya nakorner ng kalaban at nasaksak sa likod.

Nang humandusay sa kalye ay mabilis nang nagsitakas ang  mga suspect.