Lolo patay sa holdaper na sekyu

MANILA, Philippines - Isang 72-anyos na lolo ang nasawi maka­ra­ang madamay sa pamamaril ng isang security guard na hinahabol ng mga awtoridad dahil sa insidente ng panghoholdap sa isang bakery sa lungsod Quezon kamakalawa.

Sa naturang insidente, sugatan din ang security guard matapos na makipagpalitan ng putok sa mga umaarestong operatiba ng Special Weapon and Tactics (SWAT) ng Quezon City Police.

Kinilala ang nasawing lolo na si Herbin Cornista, ng Brgy. Bagong Pagasa sa lungsod sanhi ng tama ng bala ng kalibre 45 baril sa dibdib at tiyan.

Ayon kay Chief Insp. Benjamin Elenzano Jr., hepe ng Homicide Section ng Quezon City Police, mahigpit na binabantayan ngayon ng pulisya sa Quezon City General Hospital ang sugatang suspect na si Robert Pingad, 40, na nagtamo ng mga tama ng bala sa hita at dibdib.

Ayon sa ulat, nangyari ang insidente sa bahay ng biktimang si Cornista ganap na alas-8:30 ng gabi. Bago nito, nagpunta ang suspect sa isang bakery na nasa kanto ng Road 2 at Road 4 at nagkunwaring kustomer na bibili ng tinapay subalit ilang sandali pa ay bigla na lang itong nagbunot ng baril saka agad na puma­sok sa loob ng tindahan at nag­deklara ng holdap. Natangay nito ang cash na   aabot sa P7,000.

Agad namang nakahingi ng tulong sa pulisya ang mga tauhan sa bakery at kabilang si PO2 Rodolfo Saborco na nakatira ma­lapit sa tindahan na rumisponde. Ngunit hindi pa nakakalapit si Saborco ay pinapu­tukan na ito ng suspect sanhi upang mauwi ito sa palitan ng putok. Dito na napilitang tumakas ang sus­pect at magtatakbo patungo sa loob ng bahay ni Cornista na nandoon din ang anak na si Helen para magtago. Pero mabilis na naka­labas ng bahay si Helen at magsi­sigaw ng saklolo dahilan para pagbabarilin ng suspect ang matanda.

Agad namang nilusob ng operatiba ang na­sabing bahay hanggang sa mauwi ito sa palitan ng putok at bumulagtang sugatan ang suspect na nagtago sa loob ng comfort room. Kasong robbery with slight physical injury at murder ang kakaharapin ng suspect.