P13.5-milÂyong cocaine narekober ng NBI
MANILA, Philippines - Narekober ng mga tauhan ng National Bureau of Investigation (NBI) sa Eastern Samar ang may P13.5 milyong halaga ng cocaine na pinaniniwalaang bahagi ng large shipment ng illegal drugs buhat sa South American-based international drug syndicate.
Sa press conference na isinagawa kahapon sa NBI headquarters, sinabi ni Deputy Director Victor Bessat, hepe ng NBI Regional Operations Services, malaki ang kanilang paniwala na ang tatlong bricks ng cocaine na narekober ay itinapon sa dagat ng sindikato matapos na ma-intercept ang kanilang fishing vessel sa Hong Kong.
Sa ulat na ipinadala kay NBI Director Nestor Mantaring ni NBI-Eastern Visayas Regional Office (EVRO) Director Antonio Pagatpat, bukod sa mga naunang narekober na high grade cocaine sa iba’t ibang lugar sa Eastern Samar, may mga mangingisda umanong hindi nagsurender ng nasabing droga, ayon sa nakalap nilang impormasyon.
Agad namang bineripika ang impormasyon at agad na ring nagpakalat ng NBI agents sa Salcedo, Samar, upang matukoy ang sinasabing droga.
Nakipagtulungan ang lokal na awtoridad, NBI at lokal na sangay ng Philip pine Drug Enforcement Agency (PDEA) sa pagsalakay at narekober ang 3 bricks ng nasabing droga na selyado at nakasilid sa isang kahon na tumitimbang ng mahigit isang kilo.
Sinaksihan at minarkahan ang mga nakumpiskang high-grade cocaine sa presensiya ng mga local na awtoridad.
Patuloy pa umano ang pag-iimbestiga sa lugar upang mahanap pa ang sinasabing mga kasabay na droga na ibinato sa dagat sakay ng dayuhang barko na ginamit ng sindikato.
Bibigyan naman ng pabuya ng Department of Justice (DOJ) ang sinumang magsasauli sa pamahalaan ng high grade cocaine na kasama sa narekober ng NBI. (Dagdag na report ni Gemma Amargo-Garcia)
- Latest
- Trending