1 PATAY, 1 SUGATAN: Vendor inatado ang 2 kostumer

MANILA, Philippines - Sa pag-aakalang nina­na­ka­wan siya ng panin­dang isda, pinagsasaksak ng isang fish vendor ang dalawa nitong kos­tumer kung saan isa ang patay habang isa naman ang ma­lubhang nasugatan sa lungsod Quezon, kamaka­lawa.

Nasawi habang ginaga­mot sa Orthopedic Hospital ang biktimang si Ariston Pe­laez, alyas “Aries”, truck helper at stay-in sa LPA Truck­ing Service na mata­tagpuan sa Brgy. Teresita sa lungsod. Habang ang kasamahan nito na si Jay-Jay Sonio, 19, ng na­sabi ring lugar ay gina­gamot naman sa East Avenue Medical Center dahil sa ma­tinding su­gat na natamo sa ka­tawan.

Mabilis namang tuma­kas at ngayon ay tugis na ng awto­ridad ang suspek na si Domi­nic Villabrille, 23, ng 75 Iba St., Brgy. Sta. Rita sa lungsod.

Sa ulat ng pulisya, nang­yari ang insidente sa loob ng Suki Market na nasa Mayon St., ng nasabing ba­rangay ganap na alas-6 ng gabi.

Bago ito, namimili umano ng isda ang mga biktima sa nasabing pa­lengke nang ma­daan ang mga ito sa tinda­han ng suspek. Dahil may nahulog na isda sa lapag, pinulot ito ng mga biktima sanhi upang aku­sahan ang mga ito ng suspek na nagna­nakaw ng kanyang pa­ninda. Nauwi ito   sa ma­ini­tang pagtatalo sa magka­bilang panig.

Nasa kainitan ng pagta­talo nang dumampot ng kut­silyo ang suspek at inun­dayan ng saksak si Pelaez sa sikmura sanhi upang agad na bumu­lagta ito. Matapos saksakin si Pelaez sinunod naman ng suspek si Sonio na nag­tamo ng saksak sa dibdib, bago mabilis na tumakas.

Agad namang itinakbo ang dalawang biktima sa Ortho­pedic hospital kung saan bina­wian ng buhay si Pelaez. (Ricky Tulipat)