Balasahan sa chiefs of police, sinimulan

Tuluyan nang sini­bak ka­hapon sa kan­yang pwesto ni Southern Po­lice District (SPD) Di­rector Senior Supt. Jaime Calung­sod si Pasay City Police chief Senior Supt. Marietto Valerio dahil na rin sa pagiging over­­staying nito sa kanyang puwesto, ga­yundin sa kabiguang masawata ang krimen sa lungsod.

Ayon kay Calung­sod, paiiralin niya ang dala­wang taon lamang na panunungkulan ng chief of police sa anim na siyudad at isang bayan na kanyang na­sa­saku­pan kung kaya’t bago pa man sumapit ang Pasko ay tiyak aniyang mapa­palitan na lahat ng mga hepe na nakapag-lingkod na ng lagpas sa dala­wang taon.

Bukod kay Valerio na nanungkulan ng dala­wang taon at da­lawang buwan bilang hepe ng Pasay Police, nagsimula na ring ma­nungkulan kahapon bilang hepe ng Las Piñas Police si Senior Supt. Amando Clipton Empiso, kapalit ni Senior Supt. John Sosito na itinalaga sa head­quarters ng SPD.

Sa araw ng Lunes naman ang pormal na panunungkulan ni Senior Supt. Raul Petra­santa bilang bagong hepe ng Pasay, kapalit ni Valerio .

Una ng pinalitan sa puwesto noong naka­ra­ang buwan matapos ang mahigit anim na taong panunungkulan si Supt. Ronald Estilles bilang hepe ng Para­ñaque Police na sinun­dan ng pagkakasibak kina Supt. Alfred Corpus ng Taguig city police at Senior Supt. Alfredo Valdez ng Mun­­tin­lupa city police.

Si Valdez ang itina­lagang hepe ng Para­ñaque police, habang naupo naman si Senior Supt. Camilo Pancra­tius Cascolan sa Ta­guig at na­upo naman bilang OIC na Muntin­lupa si Supt. Michael Bisagas.

Sinabi ni Calungsod na bago sumapit ang Pasko ay matatapos na ang isinasagawa nilang pag-balasa sa mga hepe ng pulisya kung saan posibleng maapektuhan sina Senior Supt. Gilbert Cruz ng Makati police at Senior Supt. Alfredo Paje ng Pateros police. (Rose Tamayo-Tesoro)