12-anyos na basurero inararo ng jeep, patay

Patay ang isang 12-anyos na basurero, samantalang sugatan din ang kanyang nakatatandang kapatid at isa pang kaibigan makaraang mahagip ng rumaragasang pampasaherong jeep, kamakalawa ng gabi sa Mandaluyong City.

Nakilala ang nasawing paslit na si Bernard Conception, habang malubha namang nasugatan ang kapatid nitong si Kirby , 13 at kaibigang si Ranel Sevilla, pawang naninirahan sa Ortigas St., Brgy. Welfareville ng nabanggit na lungsod.

Agad namang naaresto ang driver ng jeep na nakilalang si Victor Tayad, 54, ng Old Sta. Mesa, Maynila.

Sa ulat, naganap ang trahedya dakong alas-7 ng gabi sa kahabaan ng P.Cruz St., Brgy. Zaniga ng nabanggit na lungsod habang papatawid ang mga biktima tulak ang kanilang kariton nang biglang dumating ang rumaragasang jeep ng suspect at nabundol ang mga ito.

Agad na nasawi si Bernard dahil sa tinamong pinsala sa katawan at ulo, habang isinugod naman sa pagamutan ang dalawa pa.

Nakatakdang sampahan ng kaukulang kaso ang driver na si Tayad. (Edwin Balasa)