Police major inireklamo nang panggugulpi sa draftsman

Nasa ‘hot water’ ngayon ang isang police major matapos umano itong ireklamo ng isang draftsman na gumulpi sa kanya kamakalawa sa Makati City.

Kinilala ang suspect na si C/Insp. Napoleon Gauyan, nakatalaga sa Camp Crame.

Samantala, ang biktima ay nakilalang si Ramon Rorecare, 37, binata, ng #1678 Eskwela St., Brgy. Guadalupe Nuevo, Makati City ay nagtamo ng bukol at pasa sa katawan.

Ayon sa rekord ng Makati City Police Complaint Desk, naganap ang insidente dakong alas-5 kamakalawa ng hapon sa Christian Sports Center, na matatagpuan sa Buenconsejo St., Makati City.

Nagkaroon ng mainitang pagtatalo ang dalawa sa hindi pa mabatid na dahilan.

Dahi dito, pinagbantaan at ginulpi umano ng suspect ang nasabing biktima, matapos ang insidente kaagad na nagpunta ang lalaki sa himpilan ng pulisya at ipinagharap ng kasong grave threat at physical injury ang naturang police major. (Lordeth Bonilla)