Ex-actor na pulis nanindak sa airport

Isang dating actor at ngayo’y pulis na nakatalaga sa Ninoy Aquino International Airport ang nahaharap sa imbestigasyon matapos umano itong magpakita ng kanyang kayabangan sa mga nakatalagang pulis sa Manila International Airport Authority (MIAA) administration building.

Nakatakdang paimbestigahan ni PNP C/Supt. Marcelo S. Ele Jr., director ng PNP-ASG si P/Insp. Jovit Moya, dating artista at nakilala bilang mainstay ng "That’s Entertainment" show ni German Moreno. Si Moya na nagpasyang mag-pulis makaraang hindi sumikat bilang artista ay sinasabing miyembro ng PNPA Class 1994.

Batay sa nilagdaang salaysay ni Gerald Tanieza, security guard ng Lanting Security and Watchman Agency na nakatalaga sa MIAA administrative building entrance gate, alas-7:05 ng umaga noong Enero 24 taong ito habang nagtsi-check sila ng mga sasakyan ng dumating ang Strada pick-up ni Moya na may plakang UNW-909 at kanilang pinahinto.

Nagalit umano si Moya at nagpakilalang aide-de-camp ng bagong hirang na NAIA General Manager Ed Manda.

Naging arogante umano si Moya at sinabi sa mga guwardiya doon na huwag silang sisitahin at tandaan ang kanyang sasakyan dahil kay Manda raw ang gamit niyang behikulo.

"Bago na ang GM at wala na ang dating memo ni Gana kapag sinita mo ulit kami sasagasaan kita," sabi umano ni Moya kay Tanieza.

Bukod dito, nabatid na nagwala rin umano si Moya sa pass control office ng airport dahil pinamamadali nito ang NAIA annual ID niya. (Ulat ni Butch Quejada)