Cuizon maoy mangulo sa duha ka terminal sa probinsiya

CEBU, Philippines — Ang kanhi regional director sa Land Transportation Franchising and Regulatory Board sa Central Visayas (LTFRB-7) nga si Ahmed Cuizon maoy mangulo sa duha ka terminal nga gidumala sa Probinsya sa Sugbo.

Giaprobahan sa hunta probinsyal ang contract of service ni Cuizon aron maoy modumala sa Cebu South Bus Terminal (CSBT) ug sa Cebu North Bus Terminal (CNBT).

Atol sa regular session sa provincial board kagahapon, Septiyembre 1, si bokal Nelson Mondigo sa 4th district maoy nangamahan sa resolusyon sa pagduso sa kontrata ni Cuizon ngadto sa provincial board.

Apan si bokal Nilo Seno nagkanayon nga dili na unta kinahanglan pa og approval sa hunta probinsyal ang contract of service ni Cuizon sanglit prerogative kini sa executive nga mo appoint, gawas lang kon kini consultancy contract.

Ang CSBT maoy usa sa mga pasilidad sa Kapitolyo nga gisaway ni Gobernador Pamela Baricuatro tungod sa kaguba sa pipila ka bahin sa terminal, safety hazards ug ilabina ang pagpabayad sa CR sa maong pasilidad.  Matud ni Baricuatro nga iyang gipili si Cuizon tungod kay aduna kini kasinatian ug eksperto sa pagdumala sa LTFRB kaniadto. (BANAT NEWS)