Warriors ‘di umubra sa Thunder

OKLAHOMA CITY – Umiskor si forward Danilo Gallinari ng 19 points habang may 18 markers si guard Dennis Schroder para banderahan ang 114-108 panalo ng Thunder laban sa Golden State Warriors.

Nagdagdag si Chris Paul ng 16 points at 9 assists at may 13 at 12 markers sina big man Steven Adams at Shai Gilgeous-Alexander, ayon sa pagkakasunod, para tulungan ang Thunder na talunin ang Warriors sa ikalawang pagkakataon ngayong season.

Humugot naman si guard D’Angelo Russell ng 17 sa kanyang 30 points sa third quarter para pangunahan ang Golden State kabilang ang isang three-pointer na nagtabla sa kanila sa 84-84 papasok sa fourth quarter.

Sa Memphis, nagsalansan si guard Luka Doncic ng 24 points, 14 rebounds at 8 assists para igiya ang Dallas Mavericks sa 138-122 paggupo sa Grizzlies.

Umiskor si Tim Hardaway Jr. ng 20 points para sa Dallas, nakahugot ng 17 at 16 markers kina Justin Jackson at Seth Curry, ayon sa pagkakasunod.

Humataw naman si Jaren Jackson Jr. ng 23 points para pamunuan ang Memphis kasunod ang 18 markers ni Jae Crowder.

Sa San Antonio, nagpakawala si Jaylen Brown ng 30 points para ihatid ang Boston Celtics sa 135-115 panalo laban sa Spurs.

Sa nasabing panalo ay nagkaroon si Gordon Hayward ng broken left hand sa dulo ng first half.

Nagdagdag si Kemba Walker ng 26 points para sa pang-pitong sunod na ratsada ng Boston (7-1).