Pasko na, Flordeliza

Tungod sa kakugihan ni Flordeliza, nasakit siya. Wala na siya maninda. Dunay tighatod niya’g mga utanon —si Sosimo. Usa ka mag-uuma si Sosimo ug ulitawo. Kada Sabado iyang hatdan si Flordeliza og mga utanon “Hain man diay si Flordeliza, Liang?” ni Sosimo ngadtong Elyang nga namugaw sa mga langaw nga buot motugdon sa taro sa ginamos. “Wa diay ka kahibawo nga nasakit man si inday Flor,” ni Elyang nga mabalak-on usab ang panagway. “Gidala ni tiya Rosing si Inday sa hospital apan nahibalik kini kay wala makasabot ang doktor sa iyang sakit.”

“Ako siyang duawon didto sa ilaha,” ni Simo nga daw nabalaka. “A, kining, nia ra bay dala kong mga utanon, ikaw na lang ang mahibawo ini. Basta sama gihapon kang Flor, magtunga gihapon ta sa halin.”

Miyango si Elyang. Unya mihinay og lakaw si Sosimo paingon sa sityo diin magpuyo si Flordeliza. Samtang siya naglakaw nadungog niyang mga alawiton sa Pasko nga gising-al sa radyo sa matag balay nga iyang maagian. Ang mga awit nga Kasadya Ning Taknaa, O Holy Night, Silver Bells ug ang Pasko sa Binilanggo maoy iyang nabati sa kasilingan. Ugma Disyembre 25 na ug Pasko na, may ihatag ra ba unta siyang Christmas gifts kang Flordeliza. Usa ka kuwintas nga may locket nga kasingkasing. Simbolo kini sa hilom niyang gugma sa dalaga. Tuod, sa didto na si Zosimo sa balay nilang Flor. Diha si Flor sa pantawan, ug nahinangop kini sa pagkakita kang Simo. “Simo, nia lagi ka,” niini pa nga nagpahiyom.

“Oo, nia ko, kay gimingaw na ko nimo. Nasakit diay ka. Luspad bitaw ang imong nawong. Sige lang, kay ugma  Pasko na man, may ihatag ko nimong pinaskohan, usa ka kuwintas, simbolo sa akong gugma nimo.” Sa pagkabati ni Flordeliza kalit nga naabtik siya ug iyang nagakos si Sosimo, “Merry Christmas in advance, ha, Simo.” Ug gigakos ni Sosimo ang babaye nga dugay na niyang gimahal. (Katapusan)