Taghoy sa panimalos

Dato ang iyang bana ug kay asawa man siya maingon nga may tipik usab siya sa maong bahandi.

Iyang gikaila si Tony sa usa ka party. Guwapohon si Tony ug nakadapit kini sa iyang pagtagad ug unya mao na lamay iyang nakita nga miduol kaniya si Tony ug mihangyo sa pagpakigsayaw ug misugot siya. Ug mao kadto ang una ug katapusan nilang panagsayaw kay sa pagka sunod adlaw mipadayag kini sa iyang gugma ug dihang iya kining gisugot mipadayag usab kini sa hugot niining tinguha nga magminyo sila. Ug miuyon usab siya.

“Okey, nakauyon ka ba sa bag-o mong palasyo, Marina? Ikaw na karon ang rayna niining maong balay,” mipahiyom si Tony. Ug nagmalipayon siya uban kang Tony. Unya dunay higayon nga mananghid kaniya si Tony nga may bisitahon ug kabahin sa negosyo. Tagsa ka semana kining mopauli. Usa ka gabii dihang mipauli si Tony ug nagdungan sila’g panihapon, may nabati silang taghoy ug kini diha sa ilang tugkaran. Kusog nga taghoy nga mora’g kontra-senyas. Midalig tindog si Marina ug gilili sa bentana kun kinsay nanaghoy. Ug maoy iyang nakita ang usa ka tawo nga nagkawo. Pinayungyong kini.   Ug unya kalit lang kining nawala. Taudtaod may mituktok sa may pultahan. Si Tony ang miabli. Igo-igo gyud nga miabli ang pultahan, may buto nga milanog ug natumba si Tony ug nabulintang sa salog sa mansion. Midalig dagan si Marina aron duolon si Tony apan may tingog nga misanta kaniya.

“Ayaw’g duola kanang tawo nga banggiitang tulisan. Iyang gitulis ug gipatay ang akong amahan ug inahan. Iya pang gilugos ang akong manghod nga dalaga. Nia ko, aron manimalos. Sa iyang paa pa nako ipalubong ang bala sa akong  pistola.

Ug ikaw, babaye, kon asawa ka man niya, gusto ko unta ikaw’ng iapil ning akong panimalos, apan inosenti ka, busa, dili ko ikaw patyon...” Nagkupot gihapon sa iyang pistola ang lalaki. Unya, may buto na pod nga milanog ug kini didto na motama sa ulo ni Tony. (Kataposan)