Mga kuko sa kalimot

Kusog kaayo ang bunok sa ulan karong hapona ug ingon sa misugod na pag-awas ang kanal diha sa may eskina nga duol sa usa ka waiting shed. Unya may nakita si Edna nga usa ka lalaki nga nagbarog nga ingon sa nabasa na sa ulan. Nia man god sa atbang sa waiting shed ang ilang balay. Unya mitabok kini ug nagdagan nga mipaingon sa ilang balay.

Maayo, maayo, mao ni ang balay ni Rufina, kadtong mag-aawit sa New Flower Night Club?” niini pa nga mihangad.

Midungaw si Edna ug mitubag. “A, kining, Mister, wala man ko kaila anang imong giingon nga Rufina nga mag-aawit sa Night Club. Basin og nasayop ka.”

Unya mitutok ang tawo kang Edna. “Uy, Rufina, ikaw di ba ikaw man si Rufina? U-unsay Edna god, si Rufina ka, uy. Ayaw tawon ko’g bakaki, Rufina.”

“Mister, ako si Edna Robal, oo, Edna Robal Salvador, kay Salvador  ang apelyido sa akong bana. Minyo na ko.” mipasabot si Edna.

“Apan, Rufina, dili ko makatuo sa imong gisulti. Tulo ka bulan na kadtong milabay nga nagkahimamat ta didto sa club. Ug duna gani kitay relasyon. Ug aron motuo ka gyod, nia, o, ako man ning gi-save ang atong hulagway’ng duha sa akong cellphone...” Gipakita sa lalaki ang hulagway diha sa cellphone. Ug nakurat si Edna kay siya tuod ang tupad sa lalaki nga nagkupot og botelya sa beer ug siya nagsandig sa abaga sa lalaki.

Ug kay wala man gyod moangkon si Edna nga siya kadtong babaye nga gipakita sa lalaki diha sa cellphone, maong milakaw na lang kini ug namulong nga mobalik siya. “Ako si Felipe, ang imong hinigugma, ug ikaw si Rufina ang mag-aawit sa New Flower Night Club...” ug mitabok ang lalaki nga ginganla’g Felipe sa karsada ubos sa nagbunok nga ulan.

Pagka gabii, gihakop gyod sa kalibog ang hunahuna ni Edna bahin sa gipahayag niadtong ginganla’g Felipe. Oo, nindot siya’g tingog apan dili siya usa ka mag-aawit. Buot niyang hinumdoman ang gisulti sa lalaki, apan wala gyod siya’y nahinumdoman. (Kataposan)