Timaan sa tim-os nga pagmahal

Nagbuwag na sila si Phoebe nga iyang asawa. Psychological ang matumbok nga rason kay si Phoebe man ang mipahayag nga gusto na kining mobalik sa mga ginikanan niini. Unom pa lang ka bulan sukad sila kasla nga didto himoa sa usa ka simbahan sa siyudad. Dili man gud dato og kaliwat si Renato, aw, hinuon, sa iyang paningkamot karon duna na silay maayong trabaho kay regular na man siya sa usa ka dakong kompaniya nga nagbasi sa siyudad. Kahilakon si Renato dihang nananghid si Phoebe nga molakaw na kini.

Mitutok si Phoebe sa iyang bana nga way mga pulong nga nanggawas sa iyang baba. Unya. “Sige, adto na ko...” mao kini ang katapusang gilitok sa iyang asawa dayong lakaw dala ang iyang maleta nga gisudlan sa iyang mga bisti ug mga gamit. Tuod, nagmingaw si Renato sa iyang balay. Wala siya patental sa mga babaye kay alang niya si Phoebe lang ang binuhat nga anaa sa suok sa iyang  kasingkasing.

Ug kay guwapohon si Renato ug batan-on pa usab dili gyod kalikayan nga may maibog kaniya. “Bay, si Shirly ba, ibog kaayo nimo. Nahibaw siya nga nagbuwag na mo sa imong asawa. Ako pa nimo uyabon na nimo,” ni Oscar nga kauban niya sa trabaho. Igo lang mipahiyom si Renato nga wala matarog sa gisulti ni Oscar kaniya.

Paglabay sa lima ka tuig nakurat si Renato kay may usa ka binuhat nga naglingkod sa ilang pantawan, ug kini mao ang binuhat nga hangtod karon, iya pa gihapong gimahal ug gihigugma. Usa ka tim-os ug timgas nga pagmahal.

“Renato,” ni Phoebe pa. “Pasayloa ko, nia mibalik ko kay dili ko makaantos sa kahaw-ang sa pag-inusara kong kinabuhi...” “Phoebe, sa gidugayon nga nahilayo ka kanako, giantos ko ang kahaw-ang ug kamingaw, ug karon nga nia ka na, imong gihataga’g awit ang akong kasingkasing. Welcome to our home, ug magsugod ta og laing anib sa atong kinabuhi isip bana ug asawa,” ug gigakos niya ang iyang asawa kinsa mibawos usab paggakos kaniya. Kataposan