Kinsay iyang labanan?

Nakahinuktok og dugay si Atty. Kenneth Inso sulod sa RTC  Library ning alas nuybe sa buntag. Duna unta siya’y i-research nga kaso apan nipatigbabaw sa iyang hunahuna ang problema ni Vina, iyang bayaw. Dili ka-concentrate si Kenneth sa iyang kasong gi-research.

Manghod si Vina sa kapikas ni Kenneth nga si Almira. Nakabana si Vina og foreigner, usa ka Amerkano. Wa sila’y anak sulod sa 17 ka tuig nga kaminyoon. Kay nagpa-vasectomy na si Frank. Unya nakigdiborsiyo si Vina kay  bisyoso sa inom si Frank. Ug himabaye pa. Unya kun mahubog mamun-og sa asawa. Kun duna sila’y mga bisita, maid ang tratamento ni Frank ni Vina.

Sumala sa Divorce Decree, ang lot and house nila sa baybayon sa barangay Tablan, lungsod sa Amiraw, maadto ni Vina. Apan nagpaugat si Frank. Wa nipahawa. Gihimulbolan ang ilang balay. Gipamaligya ang kutob sa matangtang nga mga butang lakip na ang mga aplayanses. Nakahunahuna si Vina nga ipakiha og deportation si Frank. Si Kenneth ang pahikayon sa kaso.

Dili ikalimod nga may utang kabubut-on si Kenneth ni Frank. Kay nakatabang ang naulahi sa financial sa pagkuha niya’g bar exams sa Manila. Pagpasar niya sa bar nigasto si Frank sa hikay sa pagsaulog sa iyang kalamposan sa eksamin. Gipalitan siya’g mga gamit sa opisina, sama sa mga lamesa,  mga silya ug computer. “Makatarunganon ba nga kontrahon nako ang nautangan nako og kabubut-on?” nakapangutana siya’s iyang kaugalingon. Dili niya matubag ang maong pangutana. Wa kapanaw iyang trabaho sa RTC Library. Sa tingpaniudto, nipauli siya.

“Nganong naghinuktok ka? Mora’g way ganang mukaon?” sukot ni Almira ni Kenneth dihang nag-atubang na sila sa talad kan-anan. Gisultihan niya ang kapikas sa mga pangutana sa iyang galamhan. “Ang imong utang kabubut-on sa Amerkano naimpas na. Wa na kay utang. Giserbisyohan nimo siya’g libre sa hataas nga panahon. Tanang mga problema niyang legal ikaw ang nisulbad. Busa, wa na kay utang,” ni Almira. Nakapanghupaw si Kenneth.

“Kinsa may imong palabihon? Ang Filipino o foreigner? Ang buotan nga asawa? O ang salbahis nga bana? Mao nay angay nimong ipangutana sa kaugalingon” ni Almira. Nalamdagan si Kenneth. Nigaan ang iyang panghunahuna. Giganahan na siyang nikaon. Bisa’g dili abogada iyang kapikas, apan ikaduha ni ka utok nga nipinsar sa problema. Tinuod gyud diay nga two heads are better than one. Ug natibuok ang hukom ni Kenneth nga hikayon na niya ang kaso. (Katapusan)