Guwapa nga manager - Gula 4 Nahimo

Nahimo g’yud nga purchasing officer si Lester sa kompaniya nga gidumala ni Glenna. Paglabay sa usa ka tuig, nakita sa record nga nakadaginot og dako ang kompaniya tungod kay ubos ang presyo nga gibayad niini bisan og walay giusab sa mga produkto nga ilang gipalit. Nasuta ni Glenna nga buotan ug dili mapahimuslanon si Lester.

Nakurat na lang si Lester diha nga gipatawag siya sa presidente sa kompaniya nga iyang gitrabahoan. Pagsulod niya sa opisina sa presidente, nakurat usab siya kay didto si Glenna. “Lingkod Lester,” matud ni Atty. Favian nga nagpahiyom. “Wala masayop si Glenna sa pagbutang kanimo sa puwesto kay nasayran namo nga kadto’ng imong gipulihan gi-overpriced diay ang mga produkto nga gipalit sa kompaniya.”

“Salamat kaayo sa imong pagsalig attorney,” mapaubsanon ang tonada sa tingog ni Lester. “Tungod sa dako namo nga pagsalig kanimo Lester, giaprobahan nako ang rekomendasyon ni Glenna nga ikaw na ang himoon namo nga operations manager ug ubos gihapon sa imong pagdumala ang purchasing section,” matud ni Atty. Favian.

Gilamano ni Glenna si Lester. “Congratulations nimo Lester. Padayona ang kabuotan kay dako kaayo ka’g kaugmaon dinhi sa kompaniya. Sugod karon, paisyohan ko na ikaw og service vehicle kay usa ka na man ka manager,” ni Glenna nga nagpahiyom.

Daw dili makatuo si Lester sa kalit kaayo nga promosyon nga iyang naangkon. Kapin pa lang sa tuig sa iyang pagtrabaho sa kompaniya ug karon siya na ang operations manager.

Kanunay na sila nga magsultihanay si Glenna kay siya man ang mopatuman sa mga pamaagi sa manager pagpadagan sa kompaniya.

“Dako g’yud kaayo ang akong pagpasalamat kanimo ma’am Glenna. Tungod kanimo, miasenso ko sa akong pagpanarbaho,” matud ni Lester. Igo lang mipahiyom si Glenna. “From now, Glenna na lang ang isangpit kanako Lester,” ni Glenna pa nga mitutok kang Lester. (Sumpayan)