Abogado sa mga pildero
Nikurog og gamay ang kamot ni Atty. Miguel Ganso pag-abli niya sa sobre nga gikan sa Supreme Court. Natatak sa gawas sa sobre ang case number sa kaso diin nalambigit ang maong sulat. Ang petition for review niya mahitungod sa labor case sa iyang ig-agaw nga si Lina Lugas. Nakadawat na siya’g Resolution nga gi-dimiss na ang petition for review.
Kini karong iyang nadawat, ang Resolution mahitungod sa iyang motion for reconsideration. Kun denied gani gihapon, hingpit na ilang kapildihan. Gikulbaan karong buntaga si Miguel nga nagkupot sa sobre.
Salesclerk si Lina sulod sa 26 ka tuig sa Green Meadow Merchandising nga gipanag-iya ni Mr. Teofilo Ferates. Dihang naospital si Lina kay nagpaopera sa matris, wa na siya pabalika og trabaho. Kay kuno, AWOL siya. Ug wa bayari og separation pay sa gidugayon sa serbisyo.
Nikiha si Lina sa Labor Arbiter. Gi-dismiss iyang kaso kay matud pa sa Labor Arbiter, way ebidensiya nga siya nasakit. Bisa’g ang Medical Certificate gilakip niya sa iyang Position Paper. Giapelar ni Lina ang desisyon sa Labor Arbiter, ngadto sa National Labor Relations Commission (NLRC). Apan nalangay og lima ka adlaw ang pag-file ni Miguel og Appeal Memorandum. Gi-dismiss sa NLRC ang appeal tungod sa lima ka adlaw nga langan. Nasipyat si Miguel. Abi niya’g kinse ka adlaw gihapon ang tagal, sama sa mga ordinaryong kaso. Napulo ka adlaw ra man diay ang deadline sa pagsumiter og appeal memorandum sa labor case.
Nipasaka sila’g petition for review sa Court of Appeals. Gi-dismiss gihapon.
Dakong kasubo ni Miguel sa pagbasa sa Resolution gikan sa Supreme Court. Denied gihapon ilang motion for reconsideration. Nipunit siya’s telepono ug gitawag si Lina. “Sorry kaayo, Lin. Hingpit na gyud atong kapildihan,” ni Miguel. “Unsa na man lay mahimo nako, gaw?” ni Lina sa laghaw nga tingog. “Hatagan ta lang ka og ngalan ug address sa usa ka albularyo” ni Miguel. “Unsa may mahimo sa albularyo?” ni Lina. “Di niya pakatulgon imong amo hangtud nga makabayad og separation pay” ni Miguel. “
Unsa may akong buhaton kun tua na ko’s balay sa albularyo?” ni Lina. “Isulat sa papel imong ngalan ug ngalan sa imong amo, ug mga pulong “separation pay”. Dayon mohatag ka’g donation nunot sa papel. Si Noy Julio ang albularyo nga giilang abogado sa mga pildero” ni Miguel. Nakaseguro ka gaw, nga epektibo ang albularyo?” ni Lina. “Segurado gaw, kay dihang may partner kong abogado nga wa namahin sa attorney’s fees para namong duha, si Noy Julio akong giduol. Layo rang usa ka semana, gaw. Gibahinan ko” ni Miguel. Nakapahiyom nga nahinumdum sa kanhi higala ug partner niya. (Kataposan)
- Latest