Aleman nga general manager sa hotel walay ayo

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

General manager sa usa ka dakong hotel ning dakbayan sa Sugbo sobra ka istrikto. Iyang mga empleyado ug kustomer gi-Martial Law. Dinha lay food server nga nakit-an niyang milingkod kay gikapoy na intawon sige’g tindog, wa lang kasab-i. Gibalhin pa gyud sa laing outlet nga gutom -- walay tip nga madawat gikan sa kustomer. Ubay-ubay ra ba’g anak nga gipasuso ang maong empleyada.

Parking lot nga libre alang sa kustomer ug empleyado sukad pa kaniadto, gibag-o. Pabayran na sa maong maharihariong Aleman. Mahal ra ba! Sama sa taksi, inig dagan sa oras, patak! Wala baya mag-ingon niini ang nakalabay’ng top management, kinsa maoy iyang nasundan. Siya ra! Bagulbol ang tanang naapektohan, uy! Lugpad lagi ang mga kaspa tungod sa kasuko. Natural, daghang kustomer miatras!

Presyo sa ilang pagkaon, otomatik nga gipatas-an. Wala gyu’y pahibalo sa mga concerned parties, kinsa may dakong papel sa maong negosyo. Bisa’g kuhit na lang unta. Grabe ra ba ang increase, lapaw sa 100%. Tiaw bay ang ilang hamburger nga kaniadto kapin o kulang, tag P275 ra, karon tag P675 na! Ilang tinulang isda nga kanhi P400 ra kapin, karon P1,000 na! Labi na’g steak! Ang ilang kinabaratohan karon P1,300 kapin. Angal mga kustomer, uy! Hasta manedyer sa ilang outlet mismo, mitiyabaw.

Segun pa sa asoy sa captain waiter nga giduol ning tagsulat, matag adlaw’ng Sabado kuno, kaya rang kitaon sa ilang outlet ang P250,000, pero ning kalit nga pagsaka sa presyo sa ilang baligyang pagkaon, mibahar ang sales nila ngadto sa P50,000. Ang pait kay sa dinner buffet nga ilang gi-display, usa ray mikaon. Hangtod nakaadlawon, wala na gyu’y miduol. Tipbox nila? Hangin ray sulod. Luoya!

Lakip na ang kuwarto sa maong hotel, dolyares na sab ang presyo. Nakalimot tingali ang Aleman nga branch manager nga wala na sa Germany siya magpuyo. Nia na siya sa Pilipinas. Ug dili kay nag-inusara ra ang iyang hotel. Matud pa sa mga empleyado nga gikahinabi ning tagsulat, dili kay arogante ug diktador lang ang maong langyaw. Insultador pa gyud!

Silang tanan nag-ampo nga unta mapapha ang walay ayong general manager sa labing dali nga panahon. Tunok kini sa inadlaw’ng bulohaton nga nakasamad sa ilang dughan. Buot sila nga maibot na kini sa puwesto. Anghel nga manedyer ang ilang gipangandoy. Ug dili manedyer nga sungayan.