Motuo dayon

Dear Tita Salie,

Maayong adlaw kanimo, Tita. Tagoa lang ko sa pangalan nga Jonathan, 21 years of age, from Mindanao apan karon nia ko nagpuyo sa Mandaue City ug nagtrabaho ko isip tindero.

Duna ko’y nakaila nga babaye ug tindera usab siya sa tindahan nga duol lang sa akong gitrabahoan. Malipayon gyod ko kanunay matag adlaw, Tita, kay permi man nako siya makit-an.

Hangtod nga nanguyab ko niya ug nalipay ko nga wala ko niya paantosa og dugay. Gidawat dayon  niya ang akong gugma.

Dili pa lang dugay ang among relasyon apan nakahukom nako nga ako siyang pangasaw-on. Dihang ako siyang gisultian bahin niini mosugot usab siya apan matud niya dili pa karon.

Kanunay ra ko niyang pasakitan, Tita. Usahay makadawat  ko sa iyang singhag. Apan tungod lagi kay dako ko og gugma kaniya dili na lang ko mangita og away.

Iya kong ingnon nga wala na kuno siya magkinahanglan nako ug motuo dayon ko. Sakit kaayo nakong dawaton ang iyang ipangsulti apan unsaon nako, Tita, nga nahigugma man ko? Unsa may akong buhaton? Palihog pasabta ko. Thank you very much and more power.

* * *

Dear Jonathan,

Mao kini ang giingon nga kun mosulod ka sa kalibotan sa gugma dapat nimong andamon ang imong kaugalingon tungod kay sa gugma, matud nila, ikaw pakataw-on, lipayon ug sa makadaghan ikaw pasakitan ug pahilakon.

Natural lamang nga masakitan ug makahilak ka. Tungod kay kun wala kay pakialam kay wala kay gugma dili ka gyod maapektohan sa mga panghitabo, mga gipangsulti kay wala ka may labot niini. Apan masakitan ka sa gugma tungod kay ni-care ka.

Pero, Jonathan, una nimo  dawaton ang gisulti sa imong uyab imo unang hunahunaon kun tinood ba kini ug seryoso ba siya sa iyang gisulti kanimo. Kun ingon niana ang imong batasan nga motuo dayon, pwes, ingnon tikaw nga bata ka pa aron mosulod sa gugma. Kay ang maong batasan, batasan sa usa ka bata nga dili motoo nga dunay tawo nga bugal-bugalon ug botbuton.

Sa akong tan-aw mora og sobra ka ra ka seryoso nga pagkatawo. Hinuon, maayo ang tawo nga seryoso apan dapat kamao kang motan-aw sa sitwasyon kun ang usa ka sulti o buhat dapat bang seryosohon. Ug ilha usab ang imong uyab kun unsang matang sa tawo kay kun joker ug bugal-bugalon siya makaluluoy gyod ka. -- Tita Salie