24-Oras Gula 4

 Gikan sa restaurant nga ilang gikan-an duol sa Marco Polo Hotel, misakay sila’g taksi si Oscar ug Divina paingon sa usa ka diskohan diha ra sa Salinas Drive sa Lahug. Dali ra kaayo nga miabut sila sa maong dapit.

Nangita sila og kalingkoran ug pagkataud-taud, nanayaw dayon sila si Oscar ug Divina. Wala g’yud diay mosipyat ang tagdumala sa Marajao-Karajao nga mikuha ni Divina isip usa sa ilang mga dancer nga muapil sa Sinulog kay maayo kaayong mosayaw ang dalaga.

Wala usab magpabentaha si Oscar. Sa nagtungha pa si Oscar sa kolehiyo, sakop usab siya sa dance troupe sa tunghaan mao nga maayo usab siya mosayaw.Pareho sila nga gipaningot si Oscar ug Divina ug nag-abot ang gininhawa dihang mipahuway sila human sa sunod-sunod nga tukar.

“Walay lami nga mosayaw Div kun dili ta moinum og gamay. Order ta’g beer aron madugangan ang atong kaabtik mosayaw,” giingnan ni Oscar si Divina. Mipahiyom si Divina. Gisinyasan dayon ni Oscar ang waiter ug mi-order siya’g duha ka botelya sa beer.

Mitungab dayon si Oscar sa bugnaw kaayong beer. “Inum na Div,” giagda niya si Divina. Dihang daw mihupas na ang kakutas nga ilang nasinati, mibalik sila pagsayaw si Oscar ug Divina.Milanat og 15 minutos nga wala sila’y hunong sa pagsayaw. Lingaw kaayo si Divina uban ni Oscar.

Gitiwas nila’g inum ang nahabiling beer sa tagsa-tagsa nila ka botelya. Nakamatikud si Oscar nga kilid sa diskohan nga ilang gisudlan, dunay Karaoke bar. Gisuwayan niya’g dapit si Divina nga gikan sa disco, mamalhin sila sa sing along.

“Sige, ganahan kaayo ko anang singing Oscar,” matud ni Divina nga mitug-an ni Oscar nga hilig usab siya’g kanta-kanta. Tuod, mibalhin sila sa Karaoke bar. Dili kaayo daghan ang mga customers nga nanganta.

Unang gikanta ni Oscar ang Beautiful Girl nga gipasikat ni Jose Mari Chan. “Pahinungod nako kini kanimo Div,” giingnan ni Oscar si Divina sa dayon na niyang kanta. Panagsa molingi si Divina kang Oscar samtang padayon kining mikanta.

“Bilib kaayo ko nimo Oscar kay mora’g sundog nimo ang tingog sa singer,” matud ni Divina. “Bulatik,” mubo nga tubag ni Oscar nga nagngisi. “Gusto ko unta nga mag-duet ta sa Please Be Careful with my Heart nga usa gihapon sa mga kanta ni Jose Mari Chan,” matud ni Oscar.

“Pwede ra kay makamao ko anang kantaha,” dali nga tubag ni Divina. “Hilig ka usab diay mokanta Div? Pwede ba ko mo-request nimo nga imong kantahon ang kanta ni Anne Murray nga You Needed Me?” ni Oscar pa. (Sumpayan)