Maunongon Ang Gugma

Gula 59

“Pangitaa gyud ninyo siya, Genteroy. Kinahanglang madakpan siya pagbalik ug mabilanggo. May ganti kang madawat gikan nako kun masikop ninyo pagbalik si Jeffrey Acero.”

“Ayaw kabalaka, Boss. He was encumbered with a woman, kadtong iyang gi-hostage sa dihang naapiki siya sa kapolisan nga nag-atang sa usa ka checkpoint. Mao nga dili siya makapalayo og maayo. Ug labaw nang dili gayod magdugay ang iyang pagtago-tago.”

“Paninguhaa gyud ninyo nga madakpan ninyo siya,” pagtapos ni Brandon sa panagsulti nila ni SPO3 Genteroy.

Nabalaka pag-ayo si Brandon sa pagpuga ni Jeffrey. Nasayod na siya sa hinungdan kun nganong mipuga kini. Siya’y tuyo niini. Buot kining manimalos kaniya tungod sa iyang pagduot niini nga maoy nagpatay kang Gemma Roca.

Lakip ang amahan ni Brandon nga si Mr. Ludo Mercado nabalaka usab sa pagpuga ni Jeffrey. Kini man gud ang nangusog aron mabilanggo si Jeffrey. Gigamit niini ang impluwensiya aron makombikto si Jeffrey. Nagpatabang kini sa higalang kongresista nga si Cong. Rustico Ebero paghangyo sa huwes nga naggunit sa kaso nga lutoon ang kaso ni Jeffrey. -- Sumpayan pa