Maminaw sab diay og katarungan ang engkanto

Gibantog na nga taw-an ang usa ka dakung punoan sa kahoy sa daplin sa dan-dan sa usa ka barangay sa lungsod sa Argao. (Di lang nato hinganlan ang dapit pagtabon sa personalidad sa hingtungdan).

Kun adunay moagi sa nahimutangan sa maong kahoy, di gyud sila magsaba-saba ug mananghid pa gani ang uban nga molabay sa maong dapit.

Usa ka adlaw niana, gumikan sa daghang sugyot sa mga lumolupyo nga padak-an ang dan-dan aron maagian na kini’g sakyanan, naaghat ang barangay kapitan sa maong dapit pagpangayo’g pundo sa mayor. Wa siya balibari sa mayor labi na kay nagsingabot na ang piniliay ug gihatagan siya’g gahin alang sa sa maong proyekto.

Gigiyahan dayon ni Kapitan Julio ang operator sa bulldozer sa dapit nga iyang palapdan nga agianan.

"Magsugod ka’g palapad sa dan-dan Noel! gikan dinhi sa may lugot hangtud moabot ka duol sa balay ni Enton kay masumpay na kini sa karaang karsada nga agianan sa mga sakyanan," matud sa kapitan ngadto sa operator nga si Noel.

"Di diay taas kaayo ang himoong pagpalapad sa dan-dan, Kap. Kanang punoan sa kahoy nga gibantog nga taw-an sa unahan di lang nako hilabtan?"

"Kinahanglan gyud nga imo kadtong lukahon sa bulldozer Noel kay sagabal na's agianan," tubag sa Kapitan.

"Kun maoy imong sugo Kap. Wa koy saa kun masuko ang nagpuyo nga di ingon nato nang kahoya Kap, ha?" ni Noel pa nga medyo gibati’g kahadlok.

Igo lang mipahiyom ang kapitan. Tuod man gisugdan ang pagpalapad sa dan-dan. Sa dihang miabot si Noel sa kahoy nga taw-an, mihunong siya’g makadiyot.

"Kun kinsa man mong nagpuyo diha, pahibaw-on tamong igo lang kong nagtuman sa sugo sa among kapitan nga lukahon ang inyong gipuy-an. Ayaw tawon ko’g i-apil sa inyong kasuko ug silot." Pahayag ni Noel nga daw kahilakon sa kahadlok.

Natumba gyud ang kahoy sa bulldozer ug nahuman ni Noel ang iyang trabaho paglabay sa pipila ka adlaw.

Usa ka adlaw niana, kalit lang gitakboyan og sakit si Kapitan Julio. Way doctor nga nakasabot sa iyang gimung sakit sa tiyan. Bisan unsa na lang ang tambal nga gidapat apan wa kini mohunong sa kasakit.

Gida sa ospital ang kapitan apan kay wa man gyud makaapas ang doctor nakahukom ang pamilya sa kapitan nga dad-on na lang siya sa ilang balay.

Nabaniog sa mga silingan ang sakit sa kapitan nga way doctor nakaayo niya. Silang tanan nagtuo nga gumikan kini sa taw-an nga kahoy nga iyang gipaluka sa bulldozer. Ang operator nanabi nga nangatarungan na siyang daan atubangan sa kahoy nga di iyang tuyo ang pagluka sa kahoy ug nga gisugo lang siya sa kapitan.

Hangtud karong mga adlawa, padayong nag-ilaid sa kasakit ang kapitan ug gikahadlokan nga mao kini motapos sa iyang kinabuhi. (Kataposan)