Ungo mikuyog sa prosesyon

Daghang nagduda kang Ingko Igme nga kini usa na ka mangtas nga ungo kay may nakakita man niini nga migawas sa sementeryo sa halawom nang gabii. Matud pa sa nakakita nga si Iladio nga musikiro dinhi sa ilang balangay, nahaigking siya dihang iyang nakita si Ingko Igme nga nagtakliay og usa ka sako nga dunay sulo.

Kon unsa may sulod niini wala siya masayod. Ug nakita pa gyud niya nga mora’g nakalkag ang mga buhok sa tiguwang.

Ug tungod niini gipakaylap gilayon ni Iladio nga si Ingko Igme usa na ka mangtas nga ungo kay may mitaho usab kuno kaniya nga si Ingko Igme namalbal didto sa may silingang baryo.

Ug matag gabii dinhi sa ilang balangay kanunay nang makadungog ang mga lumolupyo og tingog sa wakwak nga magbahisbahis. Dihay kausa gipasalbahan kini ni Tibur, polis sa lungsod, sa iyang pistola apan misamot hinuon ang pagsige’g wakwak ug gikan sa pagwakwak milubad kini ngadto sa pagkikik.

Unya, may gibalbal na dinhi sa ilang balangay ug ang gibalbal mao si Kuwal, ang manananggot nga maoy tigsanggot sa kalubihan sa ilang kapitan nga si Kapitan Braulio.

Ug daghan nang nagtuo nga si Ingko Igme gyud ang nagbuhat niini. Apan bugnaw usab nga mipasabot si Kapitan Braulio. “Mga silingan nako dinhi sa balangay Kuhitkuhit, wala tay igong ebidensiya aron lang si Ingko Igme maoy atong pasanginlan sa nahitabo ni Kuwal,” hinay ang tingog ni Kapitan Braulio.

“Apan, Kapitan, di na kinahanglan, klaro na kaayo kay ang tingog sa wakwak adto man mohunong tungod sa payag sa tiguwang,” mora’g gibati na’g kalagot si Iladio. Kay alang kaniya klaro gyud nga si Ingko Igme ang mangtas nga ungo dinhi sa ilang balangay. Unya, pagkasunod Sabado mao na ang pangilin sa ilang patron nga si Senyor San Vicente. Ug sama sa naandan dunay prosesyon nianang bisperas sa sayong hapon.

Ug nakurat ang tanang mga lumolupyo nga nanguyog sa prosesyon kay mao may ilang nakita si Ingko Igme nga mikuyog sa prosesyon sa ilang patron ug diha pa kini duol gyud sa Karo sa Patron.

“Bay, tan-awa, tan-awa ang mangtas nga tiguwang, nikuyog sa prosesyon,” ni Iladio pa ngadtong Damian. “Aron kunohay siya ingnon dili siya mangtas. Hu, maru gyung tigwanga...”

“Dili tingali na ungo, Bay Ladio, uy, kana si Ingko Igme kay mikuyog gud sa prosesyon,” mora’g gibati og kaluoy si Damian nga manunupi dinhi sa baryo ngadto sa tiguwang nga gidudahan ni Iladio.

“A, basta mangtas nga ungo nang tiguwanga,” hagawhaw ni Iladio sa iyang higala kinsa naa ra sa iyang duol. Unya mipadayon ang prosesyon. Hangtod nga nahibalik kini sa ilang kapilya. Ang tanang mga mata didto gyud ipunting sa tiguwang nga si Ingko Igme.

Pagka-alas dose sa gabii nakugang ang mga tawo dihang ilang nakita didto sa may tiilan sa bungtod nga gikaon sa kalayo ang payag ni Ingko Igme. Nasunog kini. Ug wala dangti’g dugay naugdaw kini, sa dihang gisusi sa mga barangay tanod sila nagtuo nga naapil gyud intawon ang tiguwang nga gidudahan nga mangtas nga ungo.

Pagkaliwas sa pista nagubot na usab ang mga tawo kay mao may napalgan didto sa may tampi sa sapa ang patay’ng lawas nila ni Iladio ug Damian. Wala na sila’y mga tinai ug mga atay ug wala na say mga dugo nga mora’g gisuyopan sila niini.

“Kinsa kahay nagbuhat niining grabeng krimen, nga wala na may mga tinai ug atay sila si Iladio ug Damian?” naglibog ang Kapitan. Unya, nianang pagkasunod adlaw, ilang nakita si Ingko Igme nga nangguna sa mga sagbot ilawom sa iyang kamunggayan. Buhi diay si Ingko Igme. Ungo gyud kaha siya? Mao kini ang midugkal sulod sa hunahuna ni Kapitan Braulio. (Kataposan)