Gabii Na, Rey Corpuz!

Human sa taudtaod nga panagsulti nila ni Rey ug Althea, ang higayon ingon sa mikalit lang og karomantiko. Naggakos sila si Rey ug Althea. Nag-akob ang ilang mga ngabil. Unya mikiat ang mga kamot ni Rey sa pagpanghiram sa pribadong parte sa lawas sa dalaga dihang natangtang na niya ang sapot niini.

Gisaw-an nila ni Rey ug Althea ang katam-is sa dugos sa himaya nga ilang gitambayayongan pagtagay. Daw mingitngit ang panan-aw ni Rey ug nahitiurok siyang dihang nagdungan sila pagsangko sa kinapungkayan sa katagbawan. Pareho silang mihangos.

"Nagtuo kong masulbad ko na sa dili madugay ang kaso nga akong giimbestigar," nagkanayon si Rey human sa ilang bugno sa kama.

"Nganong nakasulti ka man niana?" Sukit ni Althea nga miunlan sa iyang bukton.

"Tungod kay kon mokooperar lang kadtong tawo nga akong nadakpan, seguradong mailhan na kon kinsay nagsugo kanila sa pagpatay nako ug nganong gusto kong ipapatay sa nagsugo nila. Dako ang akong pagtuo nga ang nagsugo kanila sa pagpatay kanako mao ang sindikato nga miamong sa VPL sa paglambigit sa pagpalusot niini sa pekeng mga tambal dinhi sa Sugbu gikan sa Australia."

"Maayo unta kon matinuod kanang imong pangagpas, Rey, aron masulbad na ang kaso ug malimpiyohan ang ngalan sa VPL gikan sa anomaliya ug makabalik na kami sa operation. Dako na ang nawala kanamo sa pagkasera sa kompaniya."

"Diyotay'ng pailob na lang, Althea. Sa pagkakaron, kinahanglang doblehon nato ang atong pag-amping aron dili kita mausahan sa mga kaaway."

Subli nilang gitagay ang lawasnong kalipay. Gabii nang mibiya si Althea sa suite nga giokupar ni Rey sa Venus park International Hotel.

Dugay'ng natulog si Rey nianang gabhiona. Nakig-chat siya ni A-Z. bahin sa gihimo niyang imbestigasyon sa Sugbu maoy sentro sa ilang panaghisgot pinagi sa chat.

Pagkabuntag, maoy mipukaw kang Rey ang bagting sa iyang selpon nga kagabii lang niya gi-charge. Si Chief Ispector Max Jacob sa CIDG ang nanawag kaniya. Gipahibalo siya nini nga gipatay ang iyang dinakpan kagabii sulod sa ward sa hospital nga nahimutangan niini. — Sumpayan pa