Pagpaabot sa tukmang panahon

Maangyag ug makabibihag. Apan luyo niini siya natawo ug nagdako dinhi sa nasud. Mahiligon sa pagkanta diin duha na ka tuig ang milabay sa dihang una siya nga naila sa publiko isip first runner-up sa una ug nag-inusara nga search for "Born Diva" sa ABS-CBN. Siya walay lain kondili si Shanice Michael.

Ning bag-o lang mibisita si Shanice sa Sugbu alang sa tulo ka gabii nga pasundayag diha sa nabantog na kaayo nga Jazz and Bluz diha sa dalan Cabahug barangay Mabolo. Gihugyaw ni Shanice ang mga suki sa nahisgutang resto bar pinaagi sa iyang musika nga naglakip sa contemporary jazz, jazz, R&B ug Punk.

Ang 30-anyos nga si Shanice didto sa nasud sa Amerika unang nabansay sa natad sa musika. Disisyete anyos pa lang siya niadtong mga panahona dihang nahimo siyang sakop sa usa ka lokal nga banda hangtud nga nahimo siyang lead singer sa "Maximum Drive", usa ka African- American band nga nagbase didto sa Estados Unidos.

Ang inahan ni Shanice lumad nga taga Pateros, Rizal Manila ug ang iyang amahan lumad nga taga Marikina. Apan si Shanice didto matawo ug magdako sa Quezon City.

Tulo na katuig ang milabay sa dihang nakabaton og solo album si Shanice ubos sa Dyna Music. Ug isip first runner up sa "Born Diva (si Raki Vega maoy nakadaug niini -editor), nalakip usab siya sa album nga gigama alang kanilang walo ka mga finalists kauban si Zsa-zsa Padilla.

Gibutyag ni Shanice nga bata pa lang siya mahiligon na siya sa pagkanta apan bisan og wala siya makasinati og apil og mga singing contest mikita siya sa iyang pagkanta sa mga pribadong okasyon diin siya maoy dinapit nga performer.

Sanglit first timer sa singing contest, giangkon ni Shanice nga kanunay siya nga gikulbaan niadtong nagpadayon pa ang "Born Diva." Ang kantang "A House is not Home" maoy giawit ni Shanice ug milansang niya isip first-runner up.

Usa sa dili makalimtan nga kasinatian ni Shanice mao kadtong higayon nga duna siyay pasundayag didto sa Westin Philippine Plaza. Kini tungod kay niadtong mga gutlua naengganyo si Brian McKnight sa iyang performance hinungdan nga milingkod ang naulahi sa atubangan ug sa kadugayan wala makapugong nga maoy nangunay pagpatukar sa piano ug nakigduet kang Shanice.

Si Shanice mahiligon usab sa pag-compose og mga kanta og matud pa niya nga ubay-ubay na usab ang iyang namugna. Ang pag-compose matud pa ni Shanice depende lang sa mood diin bisan og manghugas ka og mga plato mahimo ka nga makamugna.

Sa mga higayon nga wala siyay proyekto dinhi sa Pilipinas, si Shanice tua sa nagkadaiyang mga nasud alang usab sa mga pasundayag sanglit kanunay siya nga dapiton sa mga tawo nga nagtoo sa iyang talento.







Damgo ni Shanice nga mamahimong usa sa mga gisimba ug giila nga mag-aawit sa industriya apan nasayod usab siya nga kinahanglan pa niya nga mokayud ug magpaabot hangtud nga moabot ang tukmang panahon.