Gipatay atol sa Death anniversary sa igsuon

CEBU, Philippines — Patay ang 37-anyos nga lalaki human giingong gidunggab sa iyang katagay og inom  sa Barangay Tubod, lungsod sa San Fernando, Cebu, alas 5:45 sa kadlawon niadtong Lunes, Oktubre 12, 2026.

Ang biktima, nga giila lamang sa alyas nga “Vic,” residente sa maong lugar, gidala sa Cebu Provincial District Hospital sa Carcar City apan gideklarar siyang dead on arrival sa doktor.

Base sa inisyal nga imbestigasyon sa San Fernando Municipal Police Station (MPS), nag-inom ang biktima kauban ang suspetsado ug ilang mga higala sa balay sa igsoon sa biktima aron sa paghinumdom sa anibersaryo sa pagkamatay sa usa ka sakop sa pamilya sa biktima.

Samtang nag-inom, nakahukom ang grupo nga mogamit og init nga tubig apan tungod kay naputol ang suplay sa tubig, gihangyo ang biktima nga ablihan ang gripo.

Giingong misunod ang suspetsado sa biktima samtang paingon kini aron ablihan ang suplay sa tubig. Didto, kalit na lang kuno kining mibunot og kutsilyo ug gidunggab ang biktima dayun niikyas palayo sa lugar,

Ang suspetsado giila lamang sa alyas nga “Andres,” 44, residente sa Barangay Magsico, San Fernando.

Nadakpan ang suspetsado sa kapolisan atol sa hot-pursuit operation sa Barangay Anislag, lungsod sa Pinamungajan, Cebu, pasado alas 12:30 sa udto sa maong adlaw, mga pito ka oras human sa insidente.

Atol sa pagpangutana, giingong miingon ang suspetsado nga wala siyay mahinumdoman sa iyang gibuhat sa dihang nahitabo ang pagpanunggab.

Nadawat usab sa kapolisan ang mga taho nga adunay giingong problema sa pangisip ang suspetsado. Apan, wala pa matino kun may kalabotan ba kini sa insidente.

Nangandam na ang San Fernando MPS sa pagpasaka og kasong murder batok sa suspetsado.—  IBM BANAT NEWS