Petisyon gisang-at aron usbon ang Animal Welfare Ordinance

CEBU, Philippines — Gisang-at sa mga animal welfare advocate ang usa ka petisyon ngadto sa buhatan sa Mayor sa Cebu City batok sa pipila ka probisyon sa Animal Welfare Ordinance sa siyudad, nga ilang gihulagway nga posibleng usa ka “deplorable injustice and cruelty.”

Ang 12-ka panid nga petisyon nga gi-address kang Cebu City Mayor Nestor Archival nanawagan sa pagpahunong ug pag-amendar sa pipila ka bahin sa Ordinance No. 2526, Series of 2019, nga nailhan usab nga Animal Welfare Ordinance of Cebu City.

Gipadayag sa mga animal advocate ang ilang kabalaka sa mga probisyon nga ilang giingon nga “prejudicial to the marginalized and indigent sectors, particularly to pet owners,” nga nakaplagan sa ordinansa.

Lakip sa ilang gitinguha nga usbon mao ang mga probisyon nga ilang gihulagway nga makadaut, sama sa pagpangayo og bayad sa registration ug ang pagpahamtang og silot sa makalapas niini.

Laing punto mao ang pagpatuman og Animal Population Control (Spay and Neuter), ug Undue Prejudice Against Marginalized and Indigent Pet Owners.

Gidugang pa nila nga posible nga wala'y igo nga konsultasyon sa publiko, lakip ang mga animal welfare groups, mga stakeholder, ug mga pet owner nga apektado sa ordinansa, sa panahon sa paghimo niini.

Matod nila ang Section 28 sa ordinansa nga naghisgot sa “Fees,” diin ang registration fee kay P200 samtang ang registration nga adunay microchip kay P600.

Sumala sa mga petitioners, bisan ang Anti-Rabies Act of 2007 wala nagmando nga obligasyon sa pet owners ang pagbayad og registration fee para sa ilang mga binuhi.

Alang kanila, kini usa ka porma sa “emotional blackmail” nga nagtumong sa pagpondo sa operasyon sa Department of Veterinary Medicine and Fisheries (DVMF) sa gastos sa mga marginalized.

Gidugang pa nila nga wala sa R.A. No. 9482, ang Anti-Rabies Act of 2007, nga nagmando nga responsibilidad sa pet owners ang pagpa-spay o neuter sa ilang mga binuhi, ug kini gihimo nga mandatory.

Tungod niini, ang mga petitioners nanawagan kang Mayor Archival, Vice Mayor, ug mga miyembro sa City Council nga usbon ang pipila ka probisyon sa Animal Welfare Ordinance labi na batok sa mga pet owners nga kabus ug marginalized.