Barangay Lahug nipatuman sab og “Sunday Lockdown”

CEBU, Philippines — Sugod kagahapong adlawa  nag-estrikto sab sa pagpatuman sa quarantine protocols ang Barangay Lahug ning Dakbayan sa Sugbo sama sa gihimo sa Brgy. Guadalupe tungod gihapon sa pagsaka sa mga kaso sa coronavirus diha sa ilang barangay.

Sirado ang tanang non-essential establishments ug kini himuon na matag adlaw nga Domingo sumala pa ni Barangay Captain Hazel Ann Muaña Empleo.

Tumong niini nga mamenusan ang mga kalihokan sa mga tawo anang adlawa sanglit daghang way trabaho anang adlawa maong daghan ang maglaroy-laroy.

Samtang di niya buot isipong kini “Sunday Lockdown” sama sa gihimo sa Guadalupe apan makasabot ra siya kun mao kini ang naa sa hunahun sa uban.

Ang gitugotan lang nga abli mao ang mga botika, remittance centers ug gasolinahan.  Matud pang Empleo nga sa miaging buwan pa naumol ang resolusyon ang konseho sa Lahug  bahin niini.

Tungod niini, ang mga APORs (authorized persons outside of residence) ug kung emerhensiya ang rason sa paggawas sa balay mao ray gitugtan.

Ang fast food chains abli gihapon apan dili puwede “dine-in” ug kutob ra sa delivery ang transaksyon nga dawaton niini.

Sa pagsuwat niining balita upat ka quarantine violators ang ilang nadakpan.

Matud pa ni Empleo, nga dunay kapin sa 70 ang active cases karon ang Lahug. Gikan sila sa wala kaabot 10 ka sitio sa 48 ka sitio sa barangay.

Giestrikto na usab ang pag-roving sa mga suok-suok nga bahin sa barangay ilabi na panahon sa curfew.

Niadtong Enero 24, gipatuman  usab sa Barangay Guadalupe  ang Sunday Lockdown gumikan sa nagsaka nga kaso sa Covid-19 sa maong barangay .

Ang Barangay Guadalupe adunay 115 active cases (base sa natala sa Pebrero 13 ) ug  53 na ka mga sitio ang natakboyan niini. Ang Guadalupe adunay 80 ka mga sitio.— IBM (BANATNEWS)