PNP naka-full alert ngayong Pasko, Bagong Taon
MANILA, Philippines — Itinaas na ng Philippine National Police (PNP) kahapon ng umaga ang full alert status sa kanilang hanay bilang paghahanda para sa pagdiriwang ng Pasko at Bagong Taon.
Nangangahulugan lamang na ipatutupad na rin ng PNP ang “No Leave Policy” na regular naman nilang ginagawa sa panahong ito upang tiyakin ang seguridad at kaayusan ng bansa.
Ayon sa PNP, tinatayang nasa 40,000 pulis ang ipakakalat upang matiyak ang peace and order sa iba’t ibang panig ng bansa.
Bukod pa ito sa pagbabantay sa ika-55 anibersaryo ng Communist Party of the Philippines (CPP) sa December 26.
Gayunman, hindi lamang PNP ang iikot at magmomonitor sa sitwasyon kundi maging ang tropa mula sa Armed Forces of the Philippines (AFP), Philippine Coast Guard (PCG), Local Government Units (LGUs), at Metropolitan Manila Development Authority (MMDA) bilang force multipliers.
Bukod rito, ipinakalat na rin ng PNP ang nasa 436 Police Service Dogs na makakatuwang ng PNP para sa explosives at illegal drug detection upang masigurong ligtas ang magiging biyahe ng publiko sa panahong ito.
Payo ng PNP sa publiko maging maingat din sa pamamasyal, pamimili at pakikihalubilo upang maiwasan ang anumang insidente.
Agad na makipag-ugnayan sa mga pulis kung kailangan ng assistance.
- Latest
