Monterroyo/co-Jordan mipakurat sa butch surveying

CEBU, Philippines - Ang team Monterroyo/Co-Jordan nagsandig sa ilang end-game rally nga nakapasugamak sa Butch Surveying, 79-74 sa katapusan nilang duwa sa elimination round sa LABA President’s Cup  2016 Second Conference niadtong Biyernes didto sa Barangay  Banilad gym, Mandaue City.

Ang co-managers nga sila si Dr. Raul Monterroyo ug Richard Jordan maoy misalida og maayo atol sa fourth quarter diin nagkumbinar sila og 12 puntos nga maoy pabilo sa mainiton nilang rally.

Sa kinatibuk-an si Jordan mihipos og 16 puntos, apil ang upat ka triples aron mangu sa Monterroyo/Co-Jordan, samtang si Dr. Monterroyo miiskor lang og siyete uban ang lima ka rebounds, apan ang iyang usa ka 3-pointer sa nahabiling 1:58 sa duwa maoy naghatag sa iyang koponan og 73-70 nga labaw ug ang iyang duha ka free throws  maoy mihingpit sa kadaugan sa Monterroyo/Co-Jordan. Si Michael Tañan mikandos og 13 puntos sa maong kadaugan.

Ang natagak nga Butch Surveying ni Engr. Butch Migriño gipangulohan ni Ronald Llanos nga miiskor og 13 puntos uban ang unom ka rebounds, gisundan nila ni Banjo Hatamosa ug Caney Abarquez nga adunay 12 puntos matag usa.

Ang kapildihan sa Butch Surveying maoy mibira sa AC Troopers  aron mokapyot sa ikaunom diin ilang harungon ang no. 3 Monterroyo/Co-Jordan sa quarterfinals.  Lain pang magsangka sa quarterfinals mao ang no. 4 Top V/Bamba batok sa no. 5 D’ Boyz.

Ang modaog sa Monterroyo/Co-Jordan ug AC Troopers maoy moabante sa semis ug ilang sangkaon ang nagpaabot nga New Millennium Hardware nga midaog sab batok sa Quiñahan, 109-93 sa ilang non-bearing game.

Samtang ang modaog tali sa Top V/Bamba ug D’ Boyz maoy makigbatok sa “twice-to-beat” Luke Genesis.

Puntos matag usa

Unang duwa:

New Millennium Hardware (109) – Grafe 16, Echavez 14, Ocier 14, Rogado 13, Ornopia 10, Sebandal 10, Ubas 10, Pacquiao 10, Chavez 10, Duhaylungsod 2.

Quiñahan (93) – Madrid 23, Marturillas 18, Carvajal 15, Oljol 14, Alburo 12, Landiza 7, Rempojo 4.

Ikaduhang duwa:

Monterroyo/Co -Jordan (79) – Jordan 16, Tañan 13, Bathan 12, Mendoza 8, Monterroyo 7. Ramos 6, Hatamosa 6, Ecot 3, Panugaling 2, Paciencia 2, Caballero 2, Menaling 2.

Butch Surveying (74) – Llanos 13, Hatamosa 12, Abarquez 12, Ramirez 8, Bukiron 8, Adolfo 7, Magale 6, Gelbolingo 4, Medillo 2, Catinoy 2. (BANAT NEWS)