Liloan mipiog sa Carmen sa OT

CEBU, Philippines — Ang Liloan mipatigbabaw batok sa Carmen, 84-82, sa labing unang overtime nga duwa sa Governor's Cup Under-18 Basketball Tournament 2026.

Si Shawn Harvey Ayuda maoy nangu sa Liloan uban ang 23 puntos, lima ka rebounds, upat ka assists ug tulo ka steals.

Nagparamdam sab si John Carl Arcelo uban ang 19 puntos, unom ka rebounds ug duha ka steals ingon man si Marionel Angtud, nga mikadlit og 15 puntos, pito ka rebounds, upat ka assists ug upat ka steals alang sa madaogon nga mga Liloanons.

Sa laing bahin, si Luke Brent Dy mipupo og 18 puntos, walo ka rebounds, duha ka assists, duha ka steals ug upat ka blocks, samtang si Jack Robert Cox mibirada og 16 puntos, upat ka rebounds, duha ka assists ug tulo ka steals sa dihang gilampaso sa Mandaue City ang Medellin, 72-46, alang sa una nilang daog.

Ang Balamban, Bogo City ug Dumanjug mipakaging sab sa ilang mga kaatbang.

Ang Balamban mipayaka sa Cordova, 74-65, ang Bogo midominar sa Tuburan, 66-50, samtang ang Dumanjug mibuntog sa San Fernando, 71-65.

Sila si Glance Batuigas ug Floyd Milan parehong mi-iskor og 15 puntos alang sa Balamban, samtang sila si Louie Estorba ug Christian Cordezar nagkumboya'g 25 puntos, walo ka rebounds, pito ka assists ug unom ka steals.

Si Rox Angelo Catana ang bida sa Bogo City bitbit ang 21 puntos, 14 ka rebounds, duha ka assists, usa ka steal ug upat ka blocks. Gisuportaan siya ni John Jaycob Lequin nga mitimbre og 15 puntos,

walo ka rebounds, upat ka assists ug unom ka steals.

Nanghugyaw sa Dumanjug si TJ James Tejedor uban ang 28 puntos, siyam ka rebounds, tulo ka assists ug pito ka steals, samtang si Clent Jediel Martinet miposte og double-double nga 14 puntos ug 13 rebounds uban ang tulo ka assists ug tulo ka steals.

Sa ubang mga resulta,  si Klent Michael Sabac mipabuto og 23 puntos uban ang upat ka rebounds, duha ka assists ug lima ka steals sa dihang gibugha sa Moalboal ang Alcoy, 75-63.

Si Reyan Lacuña mikolekta og 19 puntos, 14 ka rebounds, duha ka assists ug lima ka steals aron ituboy ang Boljoon ngadto sa 77-68 nga pagpaluhod sa Alegria, samtang si Ivan John Aljas mikulit og 15 puntos, lima ka rebounds, upat ka assists ug unom ka steals sa dihang gitumba sa Argao ang Samboan, 82-47.