Inusig ng konsensiya
Dear Dr. Love,
Noon, hindi ko ikinabahala na lalaking may asawa at dalawang anak ang sinamahan ko. Dahil para sa akin, siya ang man of my dream, matikas, mayaman at sunod lahat ng layaw ko sa katawan.
Tutol dito ang nanay ko dahil bukod aniya maliwanag ang mukha ko sa lipunan at libre pa ako sa kargo de konsiyensiya. Pero hindi ako nakinig at pumayag na ibahay ni Dino. Maligaya ako noong una. Hanggang sa unti-unti kong nakita ang punto ni nanay.
Lalo na nang tumagal ng isang buwan ang hindi pagsipot ni Dino sa aming condo dahil sa pagkakasakit aniya ng kanyang anak. Naisip ko na gusto ko magka-baby kami pero ayaw niya, magiging komplikado lang daw ang lahat. Dito ko unti-unting naramdaman ang pagka-awa sa sarili dahil ako lang ang nagmamahal at laruan lamang ako para kay Dino.
Isang sulat ang iniwan ko at tuluyan nang umalis ng aming condo. Tumawag si Dino sa opisinang pinapasukan ko, ang tanging alam niya impormasyon tungkol sa akin. Ayaw niyang pumayag na maghiwalay na kami, hindi niya raw kaya. Ngayon po ay nakakaramdam ako na miss ko na rin siya.
Ano po ang dapat kong gawin? Sinubukan kong makipagkalas na pero nanghihina na ang loob ko. Payuhan mo po ako.
Salamat po at nawa’y maunawaan ninyo ang sitwasyon ko.
Gumagalang,
Anna Marie
Dear Anna Marie,
Kung gugustuhin mo nang tanggapin na maging habang buhay ka na lang maging kabit, na uuwian at hindi; at kung ipagsasawalang bahala mo na magiging dahilan ka para mawasak ang isang pamilya, sumige ka.
Isang bagay lang ang hindi mo mababago, hindi ka magiging maligaya kung ipagpapatuloy mo ang kabuktutan na namamagitan sa inyo ni Dino. At maaaring hindi maisip sa ngayon ang kapalit ng iyong paglalaro sa apoy, pero sa takdang panahon aanihin mo ang lahat.
Kung ako sa iyo, habang may panahon pa para itama mo ang iyong buhay, gawin mo.
Dr. Love
- Latest
- Trending