Cebu City ug ubang bahin sa Metro Cebu gibaha

CEBU, Philippines — Pipila ka bahin sa Dakbayan sa Sugbo ug Metro Cebu ang gibaha tungod sa pag-uwan-uwan kagahapon, Septembre 22, 2026 nga maoy hinungdan sa pagsulod sa tubig baha sa mga kabalayan ug hinay ang dagan sa trapiko sa kadalanan.

Usa ka video ang nag-viral sa Facebook kagahapon kun diin ang residente nagpakita sa pagbaha sa usa ka sitio sa Barangay Guadalupe. Ang tubig sa sapa Guadalupe dapit sa Barangay Pasil milapas na ug misulod sa Sitio Riverside sa Pasil.

Gani, nalapas na sab sa footbridge ang tubig baha sa Barangay San Nicolas nga nakapabalaka sa mga residente gumikan kay dili na sila makatabok sa maong taytayan.

Daghang sakyanan sab ang nangatanggong tungod kay apektado ang mga kadalanan sa pagbaha sama sa M.J. Cuenco Avenue – V. Sotto Street – Zulueta Street, Colon Street – Pelaez Street – Legaspi Street, Colon Street – Junquera Street, V. Gullas Street – Mabini Street, Osmeña Boulevard – Manalili Street, M.J. Cuenco – T. Padilla Street, Osmeña Boulevard – Colon Street – P. Lopez Street. V. Gullas Street – Legaspi Street ug V. Gullas Street – D. Jakosalem Street.

Gipahimangnoan ang mga motorista nga mag-amping sa pagbiyahe, likayan ang pag-agi sa lawom nga baha, mogamit og alternatibong ruta kung mahimo, ug magpaabot sa paghubas sa tubig baha aron nga malikay sa disgrasya.

Gawas sa Cebu City, naa say pagbaha sa pipila ka dapit sa Lapu-Lapu City ug Mandaue City.

Sa weather forecast sa Philippine Atmospheric, Geophysical and Astronomical Services Administration (PAGASA), ang low pressure area sa silangan sa southeastern Luzon nahimo nang usa ka tropical depression kagahapon ug nakaapektar kini sa Central Visayas mao nga nakasinati og pag-uwan-uwan ang Sugbo nga nagdala og flashfloods o pagdahili sa yuta.

Anaa kini nahimutang sa gibanabanang 1,870 km silangan sa southeastern Luzon gawas sa Philippine Area of Responsibility kon PAR. Nagdala kini og hangin nga 45 km/h dool sa sentro ug unos nga 55 km/h. Kung ugaling makasulod kini sa PAR, tawgon kini og Bagyong Queenie.

Posible sab nga masinati ang samang kahimtang sa panahon karong adlawa, Septembre 23.

Padayon nga gi-monitor sa mga awtoridad ang kahimtang sa panahon ug ang lebel sa tubig sa mga sapa aron malikayan ang dugang nga peligro sa mga residente sa mga ubos nga lugar sa Dakbayan sa Sugbo. — IBM BANAT NEWS