Archival midepensa sa paggamit sa iyang motorcycle escorts
CEBU, Philippines — Nidepensa si Cebu City Mayor Nestor Archival nga gigamit niya ang iyang motorcycle escorts isip “street sweepers” aron mohapsay sa dagan sa trapiko ug motabang aron nga motultol ang mga motorsiklo ngadto sa ilang hustong lane isip kabahin sa pagpatuman sa Oplan BanTal:Discipline Zone.
Gipasabot ni Archival nga ang mga motorsiklong nagsunod o nag-una sa iyang sakyanan dili aron pasayonon ang iyang pagbiyahe, kondili aron mapabilin ang kahapsay sa dalan ilabina sa mga dapit nga huot ang dagan sa trapiko.
Ang pag-esplikar ni Archival subay kini sa pasangil ni Bise Mayor Tomas Osmeña nga mao’y nag-unang mosupak sa lagda sa trapiko sa BanTal corridor tungod kay mogamit kini og motorcycle escorts aron nga makalusot-lusot sa labing pinakahuot nga dalan sa siyudad.
Gihimakak ni Archival ang pasangil ug matud pa niya nga walay espesyal nga prayoridad ang motorcycle escorts kung itandi sa mga ordinaryong motorista.
“I’m not doing that para sa akong convenience. No, I’m not,” dugang niya.
Ang Assistant Department Head sa Cebu City Transportation Office nga si Atty. Kent Jongoy miingon nga wala’y rekord ang ilang opisina nga nagpakita nga nakalapas si Archival sa lagda sa trapiko sa BanTal corridor. Matud pa ni Jongoy, ang mayor mosunod sa traffic lights, pedestrian crossings ug aktibong nagpalambo sa kampanya sa BanTal corridor pinaagi sa paggamit sa public address system aron pahimangnoan ang mga motorista, ilabina ang mga rider nga kinahanglan nga mosunod motorcycle lane.
Nisuporta sab ang chief of staff ni Archival nga si Kenneth Siasar sa pamahayag ni Jongoy nga wala sila makadawat og reklamo nga nakalapas sa mga lagda ang motorcycle escorts sa mayor.
Gipasalig ni Siasar nga kung adunay reklamo kabahin sa kalapasan sa mayor o sa mga motorcycle escorts sa mayor, ila kining sutaon kung aduna ba’y pag-abuso sa lagda sa trapiko.
Una nang giingon ni Archival nga ang Oplan Bantal usa ka pamaagi aron nga mohapsay ang Banilad hangtud sa Talamban. (BANAT NEWS)
- Latest
