Pagbalitok sa Grab

Haskang paspasa nga nibali sa hangin alang sa Grab Philippines. Morag gahapon lang nga giisip ang kompaniya nga mas makiangayon nga alternatibo sa karaang mga taxi nga baho ug kagang-kagang kansang mga drayber gipasanginlan nga mas ganahang manglubag inay mangalagad sa mga pasahero.

Apan karon gipasanginlan na ang Grab, human nakig-ipon sa ilang karibal nga Uber, nga nagpahimus sa ilang monopoliya sa ride-sharing market sa Pilipinas ug Southeast Asia. Gikan sa pagkahumot nga ahente sa kausaban, ang Grab nangalisbo na ug gipasanginlang nangabuso sa mga pasahero.

* * *

Nagsugod ang kalit nga pagtibugsok sa kaligdong sa Grab sa sibaw nga reklamo sa iyang mga pasahero nga nikalit lang pagsulbong ang ilang plitehan human nawagtang ang Uber. Mahimong bungulbungolan lang ang kasarangang mga pasahero apan lisod isnabon ang kadugo ni Presidente Rodrigo Duterte.

Mao nga dihang nireklamo batok sa Grab ang pag-umangkon sa presidente nga si Kongresista Jericho Nograles, nagkarakara dayon paglusad og pakisusi ang Land Transportation Franchising and Regulatory Board (LTFRB). Ug human lang sa pipila ka adlaw, gikondenar dayon ang Grab. Nga human sa pasiunang panagang nikumpisal dayon sa makauuwaw nilang atraso.

* * *

Lahi sa ilang naandan nga kalangayan ug katapolan, tulin ug kugihan ang LTFRB nga nimando sa Grab sa paghunong sa pagkolekta sa gikuwestiyon nilang P2 matag minuto nga patong sa plitehan. Nilusot unta ang Grab nga gitugotan ang patong apan gibaraw dayon sila sa LTFRB.

Nikumpisal sab ang Grab nga wa diay nila pahibaw-a ang mga pasahero sa patong nga plitehan. Wa na hinuoy naghisgot unsaon pag-uli ngadto sa mga pasahero ang gibanabana nga P1.8 bilyones nga sobrang plitehan nga nakolekta sa Grab.

* * *

Di pa sab ta angay nga magsaulog sa paspas nga kadaogan sa mga pasahero batok sa Grab. Kay ang samang P2 matag minuto nga patong sa plitehan gikopya sa LTFRB alang sa makalilisang nga inusbawang plitehan sa mga taxi.

Nga sama sa pahimus sa Grab nakapatumaw sab sa sibaw nga protesta sa nagpakabana nga mga pasahero. Apan lahi sa kaso sa Grab nagpakabuta-bungol lang ang kadagkoan sa LTFRB. Hinaot nga, sama sa kaso sa Grab, may lain sang paryente si Presidente Duterte nga makahunahuna sa pagtiyabaw.