Boxer vs Senior citizen

CEBU, Philippines - Nag-viral karon ang usa ka video nga kuha sa usa ka closed-circuit television camera nga nagpakita sa pagsinumbagay sa usa ka 21 anyos nga professional boxer ug usa ka 64-anyos nga senior citizen diha sa usa ka gas station duol sa Barrio Luz Elementary School.

Ang professional boxer mao si Ardie Boyose, lumad nga taga San Remigio nga naghupot og 17-0 win-loss record.

Makita sa maong video  nga adunay mga batang nag-school uniforms nga  nagsumbagay ug nagtan-aw si Boyose kanila.

Nakita sa video nga miduol ang usa ka senior citizen ug gibadlong ang nagsumbagay, nag-estoryahanay usab si Boyose ug ang maong tiguwang ug sunod nga nahitabo mao na ang pagharong sa duha niadtong miaging semana. Tungod kay batan-on ug praktisado makadaghang gipalukapa sa boksidor ang senior citizen.

Apan si Boyose nga nahinabi sa Banat News miangkon sa kasaypanan apan gusto niyang klaruhon ang maong isyu kun giunsa kini pagsugod. Matud pa niya nga iyang igsuon ang usa sa mga batang nagsumbagay kay gi-bully kini sa iyang kontra diha sud sa eskuylahan.

 “Akong manghod kay gi-bully, gihapak og bag, nisumbong ni nako siya mao to gibadlong nako ang nag-away niya. Di man ko ganahan nga akong pamilya daug-daugon ug dapatan,” matud pa ni Boyose sa Banat News.

Siya miangkon nga nadala siya sa kasuko tungod kay gihataan siya og dunggab og  screw driver o icepick apan adunay niilog niini nga usa sa mga nangoryoso ug pagkahuman gibunalan siya niini og tubo apan iyang nalikayan.

Si Boyose  miingon nga ang anak sa maong senior citizen maoy nag-upload sa video kinsa wala gani didto sa paghusay sa barangay apan nikopya sa video. Didto sa barangay nibayad si Boyose og usa ka libo para sa physical injuries aron ikapatambal sa tiguwang.

Si Boyose ug iyang pamilya nabalaka  tungod kay daghang death threats nga ilang nadawat nga nag-ingong patyon siya kun makit-an sa gawas. Usa ka super lightweight  fighter si Boyose ug kataposang niduwa niadtong Hulyo 6 ning tuiga sa Lapu-Lapu diin iyang gi-knockout iyang kontra sud lang sa usa ka minuto ug 40 segundos sa first round.

Matud sa Games and Amusement Board, supervisor Rolando Mendoza nga nakahinabi sa Banat News wala silay nadawat nga reklamo bahin sa maong insidente apan adunay lagda nga imbestigahon ang maong insidente kun angay bang silotan ang boksidor.  (BANAT NEWS)