Cebu City Hall officials gireklamo diha sa CSC-7

CEBU, Philippines – Usa ka reklamo ang gisang-at diha sa Civil Service Commission nga nag-awhag ipasuspenso o matangtang sa pwesto ang mga kawani sa Cebu City Hall nga nibiya sa ilang trabaho tungod sa pagpahigayon og lihok protesta batok sa 10 ka konsehal nga nibabag pagpasar sa Supplemental Budget No. 1 niadtong Oktubre ning tuiga.

Kini maoy unod sa reklamo nga gisang-at sa managsuong Delfin Adolfo  ug  Ernesto Adolfo diha sa CSC-7 tungod sa ilang nasaksihan nga walay tawo ang pipila ka mga opisina diha sa City Hall niadtong tungora gumikan sa lihok-protesta niadtong Oktubre 7, 2015 nga gihimo atubangan sa Legislative Building.

Matud pa sa ilang reklamo, ilang gisusi ang buhatan sa Division for the Welfare of Urban Poor (DWUP) ug Burial Assistance Office ug ilang nakita  nga wala gyuy tawo sa sulod sa maong mga buhatan. Apan ilang nakit-an ang pangulo sa DWUP nga si Atty. Collin Rosell ug ang uban pang mga department heads ug mga kawani kauban sa pundok sa mga nagprotesta sa gawas.

Matud pa nila, kalapasan sa Section 16 sa  Local Government Code Section 4 of Civil Service Commission  ug Resolution Number 021316 ug Republic Act  of 6713 Section 4. – /EIM) (BANAT NEWS)