May gitago ang kangitngit

Gula 70

Gitawag ni SPO1 Nicko Bernal ang iyang hepe kay nahibilin niini ang iyang relo didto sa pansayan.

“Mahalon g’yud tingali kana nga reloha, Sir, no? Lahi man kini sa uban nga relo,” matud ni Nicko.

“Oo, giregalo kini kanako sa akong pag-umangkon ug importante kaayo kini kanako,” miingon si Chief Inspector Dindo Raval.

Igo lang gitan-aw ni Nicko ang relo. Taudtaod gayud nga gitutokan ni Nicko ang relo nga diha na sa bukton sa hepe.

Lahi ang maong relo sa ubang mga relo nga Rado nga iyang nakita. Nakapahinumdom kini kaniya sa hi-tech nga relo ni James Bond nga daghan og kagamitan.

Apan ang maong hunahuna daw abog nga gitapdas sa hangin gikan sa iyang alimpatakan.

“May pag-umangkon man gud ko nga tua magtrabaho sa Milan, Italy, ug siya ang naghatag nako niining maong relo,” dugang sa hepe.

Ug nagkuyog na lang sila paggawas sa CR ug nagdungan pagsulod sa buhatan sa hepe.

“Unsa man diay imong tuyo nako?” ni Chief Inspector Raval diha nga nagkaatubang na sila.

“Kuan, Sir, nanawag nako kaganina ang pangulo sa Bangkulis Black Brotherhood,” ni Nicko.

“U-unsa?” nakugang ang hepe. “Pero giunsa man nimo pagkasayod nga kadtong nanawag mao ang pangulo sa kulto?” (Sumpayan)