Hambog ni Mayweather
Matapos na ang Asian Games didto sa Incheon, South Korea nga diin nakita ang kaubos pa g’yud sa kalidad sa atong mga atleta kun itandi sa ubang mga silingan natong mga nasud sa Southeast Asia.
Gitapos sa Pilipinas ang kampanya pinaagi sa paghakot og usa ka gold, silver ug bronze medals nga sumada total miabot og 16 ka medalya. Ang gold medal nato gikan sa event nga “unexpected” kaayo, ang BMX off road race gikan ni Daniel Caluag.
Mas okey unta ‘to kun wala pa gitikasan sa mga opisyal sa boxing event ang mga pambato nato sa boksing in favor sa Koreans.
Sige na lang, total duna pa may Rio de Janeiro Olympics, makapangandam pa ta og maayo. Unta mas suportahan pa og maayo sa gobiyerno ug duna gihapoy mga pribadong kompanya nga mosuporta sa atong programa.
* * *
Tipas ta sa boksing, akong gikahinaman ang umaabot nga WBA super world featherweight title fight nila ni Nonito ‘The Filipino Flash’ Donaire Jr. (33-2, 21KOs) ug Jamaican boxer nga si Nicholas Walters (24-0, 20KOs) karong Oktubre 18.
Dili basta-basta nga boksidor si Walters tungod kay gisayon-sayon ra niya og pilde ang kaniadto gihuboan og bakus ni Donaire nga si Vic ‘The Raging Bull’ Darchinyan sud lang sa lima ka rounds atol sa ilang sangka sa Macau, isip supporting bout sa away ni Donaire sa South African nga si Simpiwe Vetyeka niadtong Mayo.
Si Walters natural na sa maong dibisyon, samtang si Donaire bag-ohay pa lang mitaak sa maong timbang. Apan daku ko og pagsalig ni Donaire kun footworks, speed ug power maoy hisgutan. Basta dili lang siya mawala sa iyang game plan sama sa nahitabo niya dihang gihuboan siya og bakus ni Cuban ug kanhi Olympian nga si Guillermo Rigondeaux.
* * *
Uy, nagpapansin na usab diay si Floyd Mayweather Jr., niadtong didto siya sa Moscow, Russia. Namahayag siya didto nga wala siya maglikay kang eight-division champion Manny ‘Pacman’ Pacquiao.
Matud niya kinahanglang pildihon una sa Pacquaio si Cris Algieri una pa siya modesisyon kun dawaton niya ang hagit sa Pinoy.
Taym pa, dili ba mao usab ni iyang gibuhiang pamahayag dihang iyang giingnan si Pacquiao nga kinahanglang pildihon una si Tim Bradley sa “rematch” sa duha, una pa siya modesider kun moaway siya niini? Ambot kaha kun tinuod na ba g’yud ni.
Didto usab sa London, miulbo ang kaspa ni Mayweather dihang usa ka babayeng Jamaican nga barber ang direktang miingon kaniya nga “I don’t know you.”
Matud pa sa report, nasuko ug na-shock si Mayweather ug gipangutana ang babaye kun duna ba kini telebisyon sa ilaha. Hambugero ‘gyud, kay ngano ikaw lang ba ang pirmeng ipasalida?
* * *
PAGTULON-AN: “If you wish to control others you must first control yourself” ? – Miyamoto Musashi
- Latest
