Gugma, beh!

(Autism is not a tragedy. Ignorance is!)

Gugma lagi. Daan pa ko. Bantog ra’ng nagkisikisi ko makakita nimo. Matod pa ni Doki,  lalaki kuno ka timaan  sa duha ka lisong nangka misiwil sa imong bugan nga mirehistro sa ultrasound.

Gugma gyod to. Daan pa ko.

Bantog naghinamhinam na ko mosapnay nimo. Matod pa ni Lidaisah, CS section kuno  busa ipadali nang anesthesia.

Sugdan nang pagyasyas kay nag-Rambo na ka’s akong tiyan.

Pastilan namanhod akong bat-ang.

Gugma bitaw. Daan pa ko. Bantog midagayday lusok sa mga luha dihang gidip-ig sa  midwife imong agtang duol sa akong ngabil. Unang halok ko nimo timaan sa dakong pagtahod sa kinatibuk-ang desinyo sa kinabuhi. Nalumos kos akong inagumod sa dihang gikugihan tikag buhat. Karon gigamhan kos kalipay nga way sabin imong kuyamoy ug kasway.

Gugma gyod ni. Daan pa ko. Bantog gipatambalan tika bisag buot kong kabugtoan kas gininhawa. Puol man sab diay sige’g ilis sa imong diaper, sige’g ilo, sige’g timpla. Makahurot sab diay sa kusog sige’g sayaw nimo aron makatulog ka  samtang nag-agwanta ka’s hutoy ug pislango. Bwisit ning kinabuhi-a!  Maypa’g wa ko mo-enter!

Gugma gyod hinoon ni. Sure na ko. Bantog maglisod ko pagpasagop  nimo. Mingawon ko’s imong uha. Permi ko magdagan gikan sa trabahoan aron hiabtan pa tikang nagmata. Ang imong pagtikawtikaw maoy nakapapukaw sa nabantok na nakong salabotan.

Gugma ni. Ingon bitaw ko. Dugay na ko’g iningon. Bantog gipangayo tika’s Langit. Nga unta di pa mamatay ang akong  sabakan aron duna kay kapuy-an; taguangkan nga kaduyanan samtang maghabol ko sa mamahimo natong ugma dungan sa pagligad sa katuigan.

Gugma gyod ni, Dong! Daan pa ko. Bantog bisag autistic ka nadawat tika sa hingpit. Nainat nimo akong pailob hangtod ang akong kamaldita maoy mihagtos. Nahibalag nako ang kalinaw ug kahilom taliwala ning  mga talinghaga nga lisod tugkaron, mga tigmo nga lisod hubaron. Gugma lagi. Daan pa ko. Bantog gihangop tika isip sumpay sa akong  pusod, kutay sa akong anino, langgikit sa akong unod.