Back-to-back gold ni Obiena sa Asiad
MANILA, Philippines — Hindi hinayaan ni pole vaulter EJ Obiena na mabokya sa gold medal ang Pilipinas sa 20th Asian Games kahapon sa Aichi-Nagoya, Japan.
Inangkin ng World No. 11 ranked ang gold sa pagtatala ng bagong Asiad record na 5.91-meters para talunin sina Chinese bets Yao Jie at Li Chenyang na parehong 5.70m lamang ang nakayanan para sa silver at bronze, ayon sa pagkakasunod.
Ito ang ikatlong gintong medalya ng Team PH sa Aichi-Nagoya Asiad matapos ang naunang dalawa ni gymnast Carlos Edriel Yulo sa men’s floor exercise at vault events.
Nagdagdag ng silver sina Nelly Jay Salon, Jean Marie Sucalit at Abegail Sinogbuhan matapos ang 8-15, 4-15 pagkatalo kina Nguyen Thi Khanh Ly, Le Thi Hong Lien at Nguyen Thi Thu Trang ng Vietnam sa sepak takraw women’s double finals.
Ito ang highest finish ng bansa sa sepak takraw event na idinagdag sa Asian Games noong 1990.
Nag-ambag ng bronze si Fil-Am middle distance runner Victoria Bossongang sa women’s 800m run sa kanyang bilis na 2:05.34.
Wagi rin ng bronze si surfer Jayuard Alciso sa kanyang 11.64 points laban kay teammate Toby Espejon (8.90) sa isang All-Filipino match sa men’s shortboard event.
May tatlong golds ngayon ang Pilipinas sa Aichi-Nagoya Asiad bukod sa tatlong silvers at 12 bronzes.
Sa athletics, tumapos sa ikaanim sina Anfernee Lopena, Kristina Knott, Neil Catral at Jessica Laurance (42.20) sa mixed 4x100m relay at pang-11 sina Michael del Prado, Hussein Loraña, Frederick Ramirez at Jazzpeer Arcenal (03:12.24) sa men’s 4x400-meter relay.
Talo rin sina Yacine Guermali (5th) at Sonny Wagdos (11th) sa men’s 5000m run.
Sa boxing, tatarget ng finals berth si 2020 Tokyo Olympics silver medalist Carlo Paalam sa pagharap kay 2025 world champion Makhmud Sabyrkhan ng Kazakhstan sa men’s 55kg semis match.
Sa men’s indoor volleyball, ligwak ang Alas Pilipinas Men sa Chinese Taipei, 25-21, 20-25, 17-25, 27-29, para sa kanilang 0-3 baraha sa Pool D at laglag sa classification round.
Sa women’s softball, binugbog ng Philippine Blu Girls ang Thailand, 7–0, sa limang innings para sa kanilang 2-2 record at buhayin ang tsansa sa medalya.
Sa archery, minalas sa quarterfinal spot si Gabriel Monica Bidaure matapos matalo kay Hsin-Tzu Hsu ng Chinese Taipei bet sa women’s individual recurve.
Sa shooting, tumapos ang mga Pinoy shooters sa 8th place matapos ang tatlong araw na putukan sa men’s team trap event.
Hindi umabante sa final round ng men’s individual trap event sina Hagen Alexander Topacio (25th), Eric Ang (29th) at Antonio Joseph Javines (30th).
Sa squash, bigo ang men’s team na makasampa sa knockout stage matapos ang 0-3 kabiguan sa Kuwait sa preliminary round ng Pool D.
- Latest
