Tamaraws dinagit agad ng Falcons
MANILA, Philippines — Nagliyab ang opensa ng Adamson University sa fourth quarter upang itakas ang mahirap na 56-53 panalo laban sa Far Eastern University sa UAAP Season 89 men’s basketball tournament na nilaro sa Smart Araneta Coliseum kahapon.
Naghabol ang Soaring Falcons ng siyam na puntos, 37-46 sa third quarter, biglang pumutok ang opensa nina Nigerian center Precious Jonah, Mathew Montebon, Manu Anabo, Matty Erolon, at Mat Edding upang agawin ang lamang, 54-51 may 2:09 minuto na lang ang nalalabing oras sa fourth frame.
Pinamunuan ni Montebon ang opensa para sa San Marcelino-based squad, nirehistro nito ang 18 points at apat na steals para tulungan ang Adamson na ilista ang 1-0 karta.
“We’re just very thankful that we were able to get the win. It’s a tough battle every time we play FEU. They really made it hard for us also. At some point sa game, we were kinda loss and that’s because of what FEU did to us. It just so happened that our players were able to gather and group themselves together,” sabi ni Adamson head coach Nash Racela.
Nagpasiklab para sa FEU ang kanilang rookie na si Cabs Cabonillas kung saan umiskor ito ng pitong puntos lahat galing sa payoff period subalit hindi sumapat para itaguyod sa panalo ang koponan.
Sinalpak ni Cabonillas ang huling puntos ng Tamaraws matapos ang putback mula sa mintis ni Jorick Bautista, subalit sumagot agad ang Falcons nang umiskor si Erolon may 1:33 na lang sa orasan para selyuhan ang kanilang panalo.
Nagtala naman si Edding ng 10 points habang tig-walo ang binakas nina Erolon, Anabo at Jonah.
Kumana si Season 88 High School Boys’ MVP Cabonillas ng 11 points at 12 rebounds, kapareho niyang puntos si reigning collegiate MVP Janrey Pasaol kasama ang limang assists.
Inalat si Pasaol sa kanyang shooting, nagtala ito ng 2-of-11 sa field at may limang turnovers.
Samantala, nagpasiklab si rookie Joaquin Tovera sa unang panalo ng defending champion De La Salle University.
Nirehistro ng 18-anyos na si Tovera ang 22 points at tatlong steals para tulungan ang DLSU na panain ang 89-87 panalo kontra National University.
Nagtala rin si Luis Pablo ng 16 markers, pitong rebounds para sa Taft-based squad na ipininta ang 1-0 karta, bumakas naman si Andrei Dungo ng 12 puntos.
- Latest
