P1.365 bilyones dili kurakoton- Baricuatro

CEBU, Philippines — Niabot na og P1.365 bilyon ang gibubo sa Malacañang nga kinatibuk-ang tabang alang sa padayong rehabilitasyon sa mga lugar sa Sugbo nga naapektuhan sa magnitude 6.9 nga linog niadtong Septiyembre 30, 2025, ug sa bagyong Tino.

Gipangunahan ni Presidente Ferdinand Marcos Jr. ang seremonya pag-turnover sa pundo ubos sa Disaster Rehabilitation and Reconstruction Assistance Program (DRRAP) sa Ceremonial Hall sa Malacañang Palace niadtong Nobyembre 5.

Gamiton ang pundo alang sa rehabilitasyon sa mga imprastraktura ug pasilidad sa publiko nga nangaguba sa duha ka kalamidad  lakip ang kadaot sa mga apektadong komunidad.

Sa kinatibuk-ang kantidad, P100 milyones ang gigahin alang sa Cebu Provincial Government, samtang ang nahibiling P1.265 bilyon gibahin ngadto sa 24 ka siyudad ug lungsod sa lalawigan. Matud ni Gov. Pamela Baricuatro, dako og ikatabang ang P100 milyones sa pagkompleto sa mga proyekto sa rehabilitasyon sa probinsya, ilabi na ang mga tulay nga wala pa mahuman og ayo human sa mga kalamidad.

"We have managed to fix some bridges. Although the amount that was given to us would really help us talaga to complete our recovery program," matud sa gobernador atol sa turnover.

Dugang niya, gamiton ang pundo sa pagtukod pag-usab sa mga tulay nga wala pa makompleto ang rehabilitasyon.

Giklaro usab ni Baricuatro nga ang P100 milyones alang lamang sa provincial government ug lahi pa kini sa pundo nga direktang gihatag para sa 24 ka apektadong local government units (LGUs). Iyang gipasalig nga walay makakurakot sa maong pundo. "There's no room for corruption," matud sa gobernador.

Sa mga LGU, ang Bogo City ang nakadawat sa kinadak-ang alokasyon nga P180 milyones, ang Liloan P115 milyones, P75 milyones sa Danao City ,P50 milyones matag usa ang Borbon, Sogod, Catmon, Daanbantayan, Compostela, Consolacion, Medellin, San Remigio, Tabogon ug Tabuelan.

Nakadawat sab og tag P100 milyones ang San Remigio, Cebu City alang sa pagpaayo sa mga dalan ug tulay nga naguba sa bagyong Tino.

Ang Talisay City ug Toledo City nakadawat og P50 milyones matag usa. Nakadawat usab og P50 milyones ang Mandaue City alang sa resettlement ug rehabilitasyon sa mga dalan.

Ang San Francisco nakadawat og P25 milyones, P20 milyones matag usa sa Asturias ug Balamban.

Ang Pilar, Tudela ug Poro nakadawat og P10 milyones matag usa alang sa agrikultura ug mga pasilidad nga naguba sa bagyong Tino.

Sa iyang pakigpulong, miingon si Marcos nga kaning pundo mao ang gipasalig sa nasudnong gobyerno nga tabangan ang mga lokal nga panggamhanan ug komunidad para sila makabangon gikan sa kalamidad.

Gipasiugda sa presidente nga mas nasayod ang mga lokal nga opisyal sa kahimtang ug panginahanglan sa ilang mga komunidad, busa importante ang ilang papel sa pagpatuman sa mga proyekto sa rehabilitasyon.

Sa tibuok nasud, mikabat na sa P8.6 bilyones ang giaprobahang tabang ubos sa DRRAP alang sa 306 ka LGU nga grabeng naapektuhan sa kalamidad gikan sa 2024 hangtod 2026. Gipahimangnoan usab ni Marcos ang mga opisyal batok sa korapsyon, ghost projects ug substandard nga mga proyekto, ug hugtanong gimando nga kinahanglan makaabot sa tinuoray nga nanginahanglan ang pundo. "The way forward is clear. Together, let us make sure that that recovery reaches every Filipino in need," matud sa presidente. IBM BANAT NEWS