P100T nga premyo sa CEPCA 36th anniversary tourney
CEBU, Philippines — Magtakos na sab sa ilang abilidad ang mga tang-an nga magduduwa og ahedres sa Sugbo sa Cebu Executives and Professionals Chess Association (CEPCA) 36th Founding Anniversary Tournament nga gibansagan og 7th Boy "Chessmoso" Pestaño Memorial Cup karong Dominggo, Nobyembre 8, sa Level 3 sa Robinsons Galleria Cebu, duol sa Department of Foreign Affairs (DFA)-Consular Office.
Ang mga organizers, nga gipangulohan ni CEPCA president Engr. Jerry Maratas, mihimo og pipila ka bag-ong pamaagi karong tuiga pinaagi sa pagdugang sa Challengers (mga magdudula nga adunay rating nga 1900 paubos) ug Kiddies (Under-15) nga mga kategoriya, kauban sa Masters Open, aron mas mabalanse ang kompetisyon.
Gipresentar sa Jemar Engineering Services ug Celjem Construction and Development Corp. sa pakigtambayayong sa mga pamilya nilang anhing Boy Pestaño ug Jun Olis, ang usa ka adlaw nga torneyo nga gisuportahan sa Luciano Construction and Development Corp., Atty. Sisinio Andales, Lahug National High School, JJ's Electrical Supply and Services, ug J2 Hardware modalit og dul-an sa P100,00 nga premyo.
Gawas sa tropeyo, ang kampiyon sa Masters Open mobulsa og P15,000, samtang ang manghawod sa
Challengers ug Kiddies modawat og P10,000 ug P7,000.
Aduna say ganting salapi nga gitagana alang sa top 10 sa matag dibisyon ug insentibo alang sa mga top Cepcans ug age-group performers.
Ang rehistrasyon nagkantidad og P200 alang sa aktibong mga miyembro sa CEPCA, P250 alang sa mga persons with disabilities (PWDs), senior citizens, estudyante ug mga babayeng partisipante, ug P300 alang sa regular players. Libre ang pag-apil sa mga magdudula nga adunay FIDE titles.
Ang magparehistro mismo sa binyu mobayad og P400. Hatagan sila og tunga nga puntos nga bye sa unang hugna ug magsugod na sa pagduwa sa Round 2.
Kadtong mga interesado moapil mahimong mokontak nilang National Arbiters Edwin Cablao (0923-6983109) ug Kevin Yap (0945-8559800) o ni CEPCA officer Stephen Rosales (0905-4852026).
- Latest
