Pagpangandam batok sa El Niño gihugtan sa DOE

CEBU, Philippines — Gipakusgan sa Department of Energy (DOE) ang pagpangandam sa critical facilities aron masiguro ang padayong suplay sa kuryente atol sa El Niño, samtang giawhag ni Senador Christopher “Bong” Go ang health authorities nga palig-onon ang pagpangandam batok sa mga risgo sa panglawas nga mahimong dala sa El Niño ug amihan. Pinaagi sa Task Force on Energy Resiliency, nakigtambayayong ang DOE sa National Disaster Risk Reduction and Management Council sa pagpatuman sa Department Circular No. DC2026-0114, nga nagmando sa mga ospital, rural health units, emergency medical services, water supply facilities ug DSWD food hubs nga adunay backup power systems.

Kinahanglan usab nga adunay generator o renewable energy system ang mga sakop nga pasilidad nga makapadayon sa operasyon sulod sa labing menos 72 ka oras kung maputol ang power grid, ilabina sa high-risk ug off-grid areas.

Matud usab ni Go, kinahanglan andam ang mga health facilities ug adunay igo nga medical supplies aron matubag ang posibleng respiratory illnesses, dehydration, heat exhaustion, heat stroke ug mga sakit nga may kalabotan sa kakulang sa tubig.

Gipaspasan usab sa DOE ang 200 ka power projects ubos sa Task Force 200 aron madugangan ang power generation capacity sa dili pa ang dry season. Hangtod sa Oktubre 26, 55 ka proyekto na ang nahuman, nga adunay hiniusang kapasidad nga mga 2,365 megawatts.

Giawhag usab sa DOE ang publiko ug mga negosyo nga magdaginot sa kuryente pinaagi sa episyenteng paggamit sa air conditioner ug appliances, paggamit og LED lights ug pag-apil sa Oras Natin sa Efficiency campaign. Gipasidaan sa PAGASA nga mahimong mograbe ang El Niño sa dili pa matapos ang 2026 ug mahimong molungtad ang epekto hangtod sa unang bahin sa 2027. MEL BANAT NEWS