'Goring' isa nang tropical storm, posible pa maging super typhoon — PAGASA

MANILA, Philippines — Lalo pang lumakas ang bagyong "Goring" patungong tropical storm category habang kumikilos pahilagangkanluran sa ibabaw ng Philippine Sea.

Huling namataan ang sentro ng Tropical Storm Goring 265 kilometro silangan ng Basco, Batanes, ayon sa pinakahuling taya ng PAGASA ngayong 4 p.m. ng Huwebes.

• Lakas ng hangin: 75 kilometro kada oras malapit sa gitna
• Bugso ng hangin: hanggang 90 kilometro kada oras
• Pagkilos: 10 kilometro kada oras
• Direksyon: pahilagangkanluran

"GORING is forecast to steadily intensify throughout the forecast period and may reach severe tropical storm category in the next 36 hours," wika ng state weather bureau.

"It may be upgraded into a typhoon category by Saturday during the southward segment of its looping track. While current intensity forecast indicate the progression towards typhoon category, the inherent volatility of attaining super typhoon category remains a possibility."

Mababa pa naman ang posibilidad na magdala ito ng malalakas na hangin sa bansa sa susunod na tatlong araw. Ngunit dahil sa lapit nito sa lupa, maaaring mumulan nang matindi sa ilang bahagi ng Cagayan Valley sa naturang panahon.

Maaari rin nitong palakasin ang Hanging Habagat simula Sabado o Linggo, bagay na maaaring magresulta sa minsanang pag-ulan sa kanlurang bahagi ng Luzon.

"The current forecast scenario shows that hoisting of Tropical Cyclone Wind Signals over areas in Northern Luzon may begin tonight or tomorrow in anticipation of the onset of tropical cyclone severe winds which critically depends on the changes of the extent of tropical cyclone winds as the prime determinant in hoisting Tropical Cyclone Wind Signals," dagdag pa ng PAGASA.

Tinatayang kikilos ang tropical storm pakanluran timogkanluran bago pumihit patimog habang nasa ibabaw ng katubigan ng silangang baybayin ng Cagayan Valley.

Nakikitang susunod sa isang "looping track" ang bagyo sa susunod na limang araw at posibleng bumalik sa mas pahilagang pagkilos pagsapit ng Lunes o Martes.